මාරාන්තික ඉබෝලා වෛරසය හේතුවෙන් අපි‍්‍රකානු උගන්ඩා දේශයේ පුද්ගලයන් 13 දෙනෙකු ජිවිතක්ෂයට පත්ව තිබෙනවා. කම්පාලා අගනුවරට සැතපුම් සියයක් පමණ බටහිරින් වූ ප‍්‍රදේශයකයි ඉබෝලා උවදුර නැවත පැතිරී ඇත්තේ. ප‍්‍රතිශක්තිකරණයෙන් වළක්වාලීමට අපහසු මාරාන්තික වෛරසයක් වන ඉබෝලා ආසාදනය වූවන්ගෙන් සියයට 90 ක් පමණ මියයනවා. හදිසි උණ, හිසරදය, වමනය සහ වකුගඩු ආසාදනය මෙහි රෝග ලක්ෂණයි. 1976 වසරේදී ඉබෝලා වෛරසය හඳුනා ගැනීමෙන් පසු ඉන් මියගිය සංඛ්‍යාව 1200 කට අධිකයි. 2000 වසරේ දී අපි‍්‍රකානුවන් 425 දෙනෙකු ඉබෝලා වෛරසයට ගොදුරු වූ අතර ඉන් අඩක්ම ජිවිතක්ෂයට පත්වුණා.