ජනපති අනුර තෙදින නිල සංචාරයකට ජර්මනිය බලා පිටත්ව යයි

ජනාධිපති අනුර කුමාර දිසානායක ජර්මනියේ දින 3ක නිල සංචාරයක් සඳහා මීට ටික වේලාවකට පෙර දිවයිනෙන් පිටත්ව ගිය බව අප ගුවන්තොටුපොල වාර්තාකරු සඳහන් කළා.

ජර්මානු ජනාධිපති ෆ්‍රෑන්ක් වෝල්ටර් ස්ටයින්මියර්ගේ ආරාධනාවකට අනුව ජනාධිපති අනුර කුමාර දිසානායක 11 වැනිදා සිට 13 වැනිදා දක්වා ජර්මනියේ රැඳී සිටිනු ඇති.

විදේශ කටයුතු, විදේශ රැකියා සහ සංචාරක අමාත්‍යංශය නිවේදනයක් නිකුත් කරමින් පැවසුවේ ජනාධිපතිවරයා මෙම සංචාරයේදී ජර්මානු ජනාධිපතිවරයා, ෆෙඩරල් රජයේ ප්‍රධාන අමාත්‍යවරුන් සහ අනෙකුත් සම්භාවනීය අමුත්තන් සමග ද්විපාර්ශ්වික සාකච්ඡා පවත්වනු ඇති බවයි.

රජයේ ප්‍රමුඛතා මත පදනම්ව වෙළෙඳ, ඩිජිටල් ආර්ථිකය, ආයෝජනය සහ වෘත්තිය පුහුණු අවස්ථා ඇතුළු සහයෝගීතාව සඳහා නව මාර්ග පිළිබඳව මෙහිදී සාකච්ඡා කිරීමට නියමිතව ඇති බව අමාත්‍යංශය නිකුත් කළ නිවේදනයේ සඳහන්.