දෘෂ්‍යාබාධිත කාන්තා T20 ලෝක කුසලානය මෙරටදී සහ ඉන්දියාවේදී

ක්‍රිකට් ඉතිහාසයේ ප්‍රථමවරට පැවැත්වෙන දෘෂ්‍යාබාධිත කාන්තා T20 ලෝක කුසලාන තරගාවලියට (Women’s T20 World Cup – Cricket for the Blind) සම සත්කාරකත්වය දැරීමට ශ්‍රී ලංකාව සූදානම් බවට තොරතුරු වාර්තා වෙනවා.

මෙම තරගාවලිය නොවැම්බර් 11 සිට 23 දක්වා ඉන්දියාව සමඟ ඒකාබද්ධව පැවැත්වීමට නියමිතයි.

තරගාවලිය ආරම්භ කරමින් සමාරම්භක උත්සවය සහ පළමු තරග 5 නවදිල්ලියේදී පැවැත්වෙන අතර, ඉන් අනතුරුව තරග 4ක් බැංගලෝරයේදී පැවැත්වෙනු ඇති.

තරගාවලියේ ඉතිරි තරග 15, අවසන් මහා තරගය සහ සමාප්ති උත්සවය ඇතුළුව ශ්‍රී ලංකාවේ කොළඹදී නොවැම්බර් 14 සිට 23 දක්වා පැවැත්වෙන බවයි සඳහන් වෙන්නේ.

තරගාවලිය ඒකාබද්ධව පැවැත්වීම පිළිබඳව මාධ්‍ය හමුවේදී අදහස් දැක්වූ CABI (Cricket Association for the Blind in India) හි සභාපති මහන්තේශ් ජී. කිවදසන්නාවර් පවසා සිටියේ මෙවැනි අදහසක්.

"මෙම සහයෝගිතාව කාන්තා අන්ධ ක්‍රිකට් ක්‍රීඩාවේ ඓතිහාසික මොහොතක් නිර්මාණය කරනු ඇති අතර, බාධක බිඳ දමා පරම්පරා ගණනකට ආස්වාදයක් ලබා දීමට ක්‍රීඩාවේ ඇති බලය විදහා දක්වනු ඇත. මෙම ඓතිහාසික, ක්‍රීඩාව වෙනස් කරන සිදුවීම ඒකාබද්ධව සත්කාරකත්වය දැරීමට අපගේ ඉල්ලීමට ඉඩ ලබා දීම පිළිබඳව ශ්‍රී ලංකා ක්‍රීඩා අමාත්‍යවරයාට සහ ශ්‍රී ලංකා රජයට අපගේ ස්තුතිය පිරිනමනවා. ලෝක කුසලානයට අනුග්‍රහය දැක්වීමෙන් සහ තරගවලදී ක්‍රීඩකයන් දිරිමත් කිරීමෙන් සහභාගී වන කණ්ඩායම් දිරිමත් කරන ලෙස ශ්‍රී ලාංකිකයන්ගෙන්, ව්‍යාපාරික ආයතනවලින් සහ දානපතිවරුන්ගෙන් මම අවංකව ඉල්ලා සිටිමි."