ගොවි ජන සංවර්ධන කොමසාරිස් ජනරාල්වරයාගේ අත්සන ව්‍යාජව භාවිතා කළ ලිපි ගැන විමර්ශන

කුඹුරු ඉඩමක් නොවන ඉඩමකට ගොවී ජන සංවර්ධන කොමසාරිස් ජනරාල්වරයාගේ අත්සන, ලිපි ශීර්ෂ ඇතුළත් කර ව්‍යාජ ලෙස සාදනු ලැබු බව කියන ලිපි සම්බන්ධව වහාම විමර්ශනයක් පවත්වා අධිකරණයට වාර්තාවක් ඉදිරිපත් කරන ලෙස කොළඹ අතිරේක මහේස්ත්‍රාත් ඕෂධ මිගාර මහාආරච්චි  අද (3) අපරාධ පරීක්ෂණ දෙපාර්තමේන්තුවට නියෝග කළා.

ගොවිජන සංවර්ධන කොමසාරිස් ජෙනරාල් අබේරත්න විසින් අපරාධ පරීක්‍ෂණ දෙපාර්තමේන්තුවට 2022 සැප්තැම්බර් 27 දින කරන ලද පැමිණිල්ල සලකා බැලීමෙන් පසුව අධිකරණයෙන් එලෙස නියෝග කළා.

සිද්ධිය සම්බන්ධයේ වැඩිදුරටත් අධිකරණයට කරුණු දැක්වූ අපරාධ පරීක්ෂණ දෙපාර්තමේන්තුව සඳහන් කර සිටියේ, ගොවිජන සංවර්ධන දෙපාර්තමේන්තුවේ නීති සහකාර කොමසාරිස් ලෙස රාජකාරි කරනු ලැබූ නිළධාරියා වෙත පහත්බිම් ගොඩ කිරීම හා සංවර්ධනය කිරීමේදි ලැබූ ඉඩමක් සම්බන්ධව වූ අයදුම්පත සැක සහිත වූ බැවින් එය නිත්‍යානුකූලව නිකුත් වී ඇති ද යන්න සිදුකරන ලද පරීක්‍ෂණයට අනුව මෙම පැමිණිල්ල කළ ඇති බවයි.

ඉදිරිපත් වූ කරුණු සලකා බැලූ මහේස්ත්‍රාත්වරයා සිද්ධියට අදාළව විමර්ශන කටයුතු සිදු කර ප්‍රගති වාර්තාවක් අධිකරණයට ඉදිරිපත් කරන ලෙස නියෝග කළා.