"ඉරානයට ප්‍රහාර එල්ල කරනවා" – ට්‍රම්ප් TIME සඟරාවට කියයි

එළැඹෙන තීරණාත්මක අමෙරිකානු පාර්ලිමේන්තු මැතිවරණයට මාසයකට ආසන්න කාලයක් ඉතිරිව තිබියදී, ඇමෙරිකානු ජනාධිපති ඩොනල්ඩ් ට්‍රම්ප් TIME සඟරාව සමග පැවැත්වූ විශේෂ සම්මුඛ සාකච්ඡාවකදී ඉරානය සමග කිසිදා සාමයක් ඇති කරගත නොහැකි බව ප්‍රකාශ කර ඇති බව CNN පුවත් සේවය පවසනවා.

පසුගිය සඳුදා ඕවල් කාමරයේදී පැවැති මෙම මිනිත්තු 75 ක සාකච්ඡාවේදී, ඉරාන යුද්ධය, ශ්‍රේෂ්ඨාධිකරණ විනිසුරුවරුන් පත්කිරීම්, වයිට් හවුස් ප්‍රතිසංස්කරණ ඇතුළු මාතෘකා රැසක් පිළිබඳව ජනාධිපතිවරයා අදහස් දක්වා තිබෙනවා.

මෙහිදී මාධ්‍යවේදීන් නැගූ ප්‍රශ්න හමුවේ දැඩි කෝපයට පත් ට්‍රම්ප්, "ඔබලාගෙන් එකදු යහපත් හෝ ධනාත්මක ප්‍රශ්නයක්වත් ඇසුවේ නැහැ, සියල්ල ඍණාත්මකයි" යනුවෙන් පවසා ඇති බවයි වාර්තා වෙන්නේ.

ඉරානය විනාශ කිරීම සම්බන්ධයෙන් මාධ්‍යවේදීන් විමසා සිටි ප්‍රශ්නයකට පිළිතුරු දෙමින් ට්‍රම්ප් සඳහන් කළේ, "ඉරානය විනාශ කිරීම මගින් අපි ලෝකයට සාමය උදා කර දුන්නා. ඉරානය සමග සාමයක් ඇති කරගත හැකියි කියා මා සිතන්නේ නැහැ" යනුවෙන්.

ඉරානය සමග ඇති වී තිබෙන යුදමය තත්ත්වයට මාස හතකට ආසන්න කාලයක් ගත වී ඇතත්, පවතින තත්ත්වය පාලනය කිරීමට ජනාධිපතිවරයාට පැහැදිලි සැලැස්මක් නොමැති බව ඇමෙරිකානු ජනතාවගෙන් 75% කට ආසන්න ප්‍රමාණයක් විශ්වාස කරන බව මෑතකදී සිදුකළ ජනමත විචාරණවලදී හෙළි වී තිබෙනවා.