උස්බෙකිස්ථාන කතක් තහනම් වැඩක යෙදවූ රියැදුරාට වසර 10ක සිරදඬුවම්

උස්බෙකිස්ථාන ජාතික කාන්තාවකට රැකියා පොරොන්දු දී ශ්‍රී ලංකාවට ගෙන්වා, බලහත්කාරයෙන් හා තර්ජනය කරමින් ගණිකා වෘත්තියේ යෙදවීමේ චෝදනාවට වරදකරු වූ ශ්‍රී ලාංකික ත්‍රිරෝද රථ රියැදුරෙකුට වසර 10ක බරපතල වැඩ සහිත සිරදඬුවම් සහ රුපියල් 10,000ක දඩයක් නියම කිරීමට කොළඹ මහාධිකරණ විනිසුරු ලංකා ජයරත්න අද (02) නියෝග කළා.

2021 ජනවාරි 01 වැනි දින කොළඹ ගලදාරී හෝටලයේදී ඔක්සානා කර්පොවා නමැති උස්බෙකිස්ථාන ජාතික කාන්තාව මෙලෙස ලිංගික සේවය සඳහා කුට්ඨනය කිරීම සම්බන්ධයෙන් දණ්ඩ නීති සංග්‍රහයේ 360 අ (1) වගන්තිය යටතේ නීතිපතිවරයා විසින් මෙම නඩුව ගොනු කර තිබුණා.

විත්තිකරු ('ලෝරන්ස්') සහ ඔහුගේ උස්බෙකිස්ථාන ජාතික බිරිඳ ('ජෙස්මින්') එක්ව මසකට ඩොලර් 1,500ක වැටුපක් හෝ දරුවන් බලාගැනීමේ රැකියාවක් ලබාදෙන බව පවසා අදාළ කාන්තාව මෙරටට ගෙන්වාගෙන ඇති බවයි සඳහන්.

පසුව ඇගේ ගමන් බලපත්‍රය ‍රැගෙන, තර්ජනය කරමින් කොළඹ සහ මීගමුව ප්‍රදේශවල හෝටල් වෙත යවා ඇයව ලිංගික සේවයේ යොදවා තිබුණා.

එලෙස ලබාගන්නා මුදල් විත්තිකරු විසින් පාලනය කර ඇති අතර, එක් අවස්ථාවකදී පාරිභෝගිකයෙකුගෙන් ලැබුණු රුපියල් 5,000ක ඉතිරි මුදලද ලෝරන්ස්ගේ පෞද්ගලික බැංකු ගිණුමට තැන්පත් කර තිබූ බවට බැංකු වාර්තා මගින් තහවුරු වුණා.

නොනවත්වා සිදුවූ පීඩනය හමුවේ වින්දිත කාන්තාව තම මවට රහසින් තොරතුරු දැනුම් දීමෙන් පසුව, උස්බෙකිස්ථාන පොලිසිය කළ දැනුම්දීමකට අනුව ශ්‍රී ලංකාවේ අපරාධ පරීක්ෂණ දෙපාර්තමේන්තුව විසින් ඇයව මුදාගෙන තිබුණා.

ඉදිරිපත් වූ සාක්ෂි මගින් පැමිණිල්ලේ චෝදනා සාධාරණ සැකයකින් තොරව තහවුරු වීම හේතුවෙන් විත්තිකරුට මෙලෙස බරපතළ සිරදඬුවම් නියම කෙරුණා.