දරුවන් දෙදෙනෙක් හැදුව බව කියමින් හිටපු පෙම්වතාගෙන් ගරපු කාන්තාවට එංගලන්ත අධිකරණයෙන් තීන්දුවක්

දරුවන් දෙදෙනෙකු බිහි කළ බව පවසමින් සිය හිටපු පෙම්වතාව වසර දෙකකට ආසන්න කාලයක් රැවටූ කාන්තාවක් සම්බන්ධයෙන් එංගලන්ත මහාධිකරණ විනිසුරුවරියක් තීන්දුවක් ලබාදී තිබෙන බව BBC පුවත් සේවය වාර්තා කරනවා.

අදාළ කාන්තාව ගැබ්ගෙන සිටින බවට පැවසීමෙන් පසු, අල්ට්‍රා සවුන්ඩ් ඡායාරූපයක්ද යවා ඇති අතර, කාලයත් සමඟ ගැබ්ගෙන ඇති බව පෙනෙන ආකාරයෙන් හැසිරී ඇති බවයි අධිකරණයේදී අනාවරණ වී ඇත්තේ.

පළමු දරුවා උපන් බව පවසමින් ඇය සිය හිටපු පෙම්වතාගේ පවුලේ සාමාජිකයින්ට පණිවුඩ සහ දරුවෙකුගේ ඡායාරූප යවා ඇති බවත්, ඇතැම් අවස්ථාවලදී දරුවෙකු අඬන හඬ සහිත හඬ පණිවුඩ පවා යවා ඇති බවත් සඳහන්.

පසුව තවත් වරක් ගැබ්ගෙන ඇති බව පවසමින් 2024 අගෝස්තු මාසයේදී දරුවෙකු බිහි කිරීමට නියමිත බව ඇය ප්‍රකාශ කර තිබෙන අතර, එම කාලය තුළ හිටපු පෙම්වතා ඇයට පවුම් 30,000කට ආසන්න මුදලක් ලබාදී ඇති බවද අධිකරණයේදී හෙළිවුණා බවත් විදෙස් මාධ්‍ය සඳහන් කරනවා.

කෙසේ වෙතත්, පසුව අධිකරණය හමුවේ ඇය පිළිගෙන ඇත්තේ එම ගැබ්ගැනීම් සහ දරුවන් සම්බන්ධයෙන් තමන් බොරු ප්‍රකාශ කළ බවයි.

විනිසුරුවරිය සඳහන් කර ඇත්තේ දරුවන් සැබවින්ම සිටි බවට පෙන්වන කරුණුවලට වඩා, එවැනි දරුවන් නොසිටි බවට පෙන්වන කරුණු ඉතා ප්‍රබල බවයි.

කාන්තාව මෙම බොරු ප්‍රකාශ සිදුකර ඇත්තේ තම හිටපු පෙම්වතාගෙන් පළිගැනීමේ අරමුණින් බවද අධිකරණයට පවසා තිබෙන බවත් විදෙස් මාධ්‍ය වැඩිදුරත් වාර්තා කරනවා.