General04 October 2026

පුනර්ජනනීය බලශක්ති ව්‍යාපෘති කුණු කූඩයට විසි කිරීමේ වැඩපිළිවෙළක් වත්මන් රජය ක්‍රියාත්මක කරනවා - විපක්ෂ නායක සජිත්

අඛණ්ඩව, ඉහළ ගුණාත්මකභාවයකින් සහ අඩුම ඒකක මිලක් යටතේ විදුලිය ලබාදීම කේන්ද්‍ර කරගත් විදුලි ජනන ප්‍රතිපත්තියක් රටට අවශ්‍ය බව විපක්ෂ නායක සජිත් ප්‍රේමදාස පවසනවා.

එය සාක්ෂාත් කරගත හැක්කේ පුනර්ජනනීය බලශක්තිය හරහා බවත්, බලය නොමැති සමයේ පුනර්ජනනීය බලශක්තිය සම්බන්ධයෙන් විවිධ සටන් පාඨ ඉදිරිපත් කළ වත්මන් රජය බලයට පත්වීමෙන් පසු එම ව්‍යාපෘති කුණු කූඩයට විසි කිරීමේ වැඩපිළිවෙළක් ක්‍රියාත්මක කර ඇති බවත් ඔහු සඳහන් කළා.

විපක්ෂ නායකවරයා මේ බව කියා සිටියේ සූර්ය බලශක්ති ව්‍යවසායකයන්ට බලපාන රජයේ ප්‍රතිපත්තිමය තීන්දු සම්බන්ධයෙන් මෙරට ඔස්ට්‍රේලියානු මහකොමසාරිස් Matthew Duckworth දැනුවත් කිරීම සඳහා විපක්ෂ නායක කාර්යාලයේ පැවති හමුවකින් අනතුරුව අදහස් දක්වමින්.

2016 වසරේදී සූර්ය බලශක්ති ක්ෂේත්‍රය තුළින් ව්‍යවසායකයන් දහස් ගණනක් බිහි වූ බවත්, ඉංජිනේරුවන්, තාක්ෂණික නිලධාරීන් සහ ස්වයං රැකියා හා ව්‍යවසායකයන් ලෙස විශාල පිරිසක් එම කර්මාන්තයට සම්බන්ධ වූ බවත් සජිත් ප්‍රේමදාස පෙන්වා දුන්නා.

කෙසේ වෙතත් මේ වනවිට සූර්ය බලශක්තිය මත පදනම් වූ ක්ෂුද්‍ර, කුඩා හා මධ්‍ය පරිමාණ කර්මාන්ත ක්‍රමයෙන් විනාශ වෙමින් පවතින බවයි ඔහු සඳහන් කළේ.

එම ක්ෂේත්‍රයේ ව්‍යවසායකයන්ට දේශපාලන හෝ ගජමිතුරු සම්බන්ධතා නොමැති බැවින් ඔවුන්ගේ ව්‍යවසායකත්වය අඩපණ කරන රාජ්‍ය ප්‍රතිපත්තියක් ක්‍රියාත්මක වන බවට ද විපක්ෂ නායකවරයා පවසා සිටියා.

සූර්ය බලශක්ති ව්‍යවසායකයන් විසින් මාසිකව රුපියල් බිලියන 25කට වැඩි මුදලක් රටට ඉතිරි කරමින් මෙගාවොට් 2,500කට ආසන්න විදුලි ධාරිතාවක් පද්ධතියට එක් කරන බවත්, එවැනි පිරිසක් වෙනුවෙන් වහල මත සූර්ය බල පද්ධති ලක්ෂ 10ක ඉලක්කයක් කරා යාමට රටක් ලෙස නොහැකි මන්දැයි ප්‍රශ්න කරන බවත් ඔහු පැවසුවා.

දැනට වහල මත සවිකර ඇති සූර්ය බල පද්ධති සංඛ්‍යාව 150,000ක් පමණ බවත්, ස්වභාවික සම්පත් ලෙස සූර්ය බලය, ජලය සහ සුළං බලය තිබියදී කෝටි ප්‍රකෝටි ගණනින් තාප බලාගාර ආශ්‍රිත ආයෝජන සිදුකරන බවත් විපක්ෂ නායකවරයා සඳහන් කළා.

මේ අතර සූර්ය බලශක්ති ඒකකයක් සඳහා පැවති රුපියල් 37ක මුදල රුපියල් 27 දක්වාත්, පසුව රුපියල් 20කටත් අඩු මට්ටමකටත් අඩු කර ඇති බව සජිත් ප්‍රේමදාස සඳහන් කළා.

නෙට් ප්ලස් ක්‍රමවේදය හරහා සූර්ය බලශක්ති ව්‍යවසායකයන් එම ආයෝජනවලින් ඉවත් වන තත්ත්වයක් නිර්මාණය කරන්නේ තාප හා ඉන්ධන බලාගාර ක්ෂේත්‍රයේ න්‍යාය පත්‍රය රජය අනුගමනය කරන නිසාදැයි ඔහු ප්‍රශ්න කළා.

ඔස්ට්‍රේලියාව සහ නෝර්වේ වැනි රටවල පුනර්ජනනීය බලශක්තිය සම්බන්ධ අත්දැකීම්වලින් ශ්‍රී ලංකාව පාඩම් ඉගෙන ගත යුතු බවත්, රටේ පුනර්ජනනීය හා සූර්ය බලශක්තිය ප්‍රවර්ධනය කිරීමට කටයුතු කළ යුතු බවත් විපක්ෂ නායකවරයා පෙන්වා දුන්නා.

හෝර්මූස් සහ බාබ් අල් මන්දාබ් සමුද්‍ර සන්ධි ආශ්‍රිතව පවතින යුදමය තත්ත්වය හමුවේ ඉන්ධන හා තාප බලාගාර මත වැඩි වශයෙන් රඳා සිටීම රටේ වර්තමානයට මෙන්ම අනාගතයටද අහිතකර බවයි ඔහු කියා සිටියේ.

ඒ අනුව අඛණ්ඩව අඩුම වියදමකින් විදුලිය නිපදවිය හැකි පුනර්ජනනීය සහ සූර්ය බලශක්තිය කෙරෙහි අවධානය යොමු කළ යුතු බවත්, පුනර්ජනනීය බලශක්තිය ප්‍රවර්ධනය කරන ඕනෑම වැඩපිළිවෙළකට සමගි ජන බලවේගය උපරිම සහයෝගය ලබාදෙන බවත් සජිත් ප්‍රේමදාස වැඩිදුරටත් ප්‍රකාශ කළා.
Related recommendation
Hiru TV News | Programmes