International08 October 2026

ඔස්ට්‍රේලියාවේ පළමු වරට ඩෙංගු එන්නත භාවිතයට අවසර - සංචාරකයින්ට විශේෂ උපදෙස්

ඔස්ට්‍රේලියානුවන් අතර ජනප්‍රිය සංචාරක ගමනාන්ත රැසක ඩෙංගු රෝගය ව්‍යාප්ත වීමත් සමඟ, එරට ඉතිහාසයේ පළමු වරට ඩෙංගු රෝගය සඳහා වන එන්නත භාවිතයට ගැනීමට අවසර දී තිබෙනවා.

විදෙස් මාධ්‍ය වාර්තා කළේ, ඔස්ට්‍රේලියානු ප්‍රතිශක්තිකරණ උපදේශක කමිටුවේ (ATAGI) නව මාර්ගෝපදේශ අනුව 'Qdenga' ලෙස හඳුන්වන මෙම එන්නත ඇණවුම් කිරීමට දැන් එරට වෛද්‍යවරුන්ට පහසුකම් සපයා ඇති බවයි.

විශේෂයෙන්ම මීට පෙර ඩෙංගු වැළඳී ඇති සහ විදේශ සංචාරවල නිරත වන පුද්ගලයින්ට මෙම එන්නත ලබා ගන්නා ලෙස උපදේශක කමිටුව දැඩි ලෙස අවධාරණය කර තිබෙනවා.

ඊට අමතරව, මීට පෙර ඩෙංගු වැළඳී නොමැති වුවද අවුරුදු හතරට වැඩි පුද්ගලයින් ඩෙංගු අවදානම් සහිත රටවල කෙටි කාලීන සංචාර නිරත වන්නේ නම්, වෛද්‍ය උපදෙස් මත මෙම එන්නත ලබා ගැනීම කෙරෙහි අවධානය යොමු කළ හැකි බව ද එම මාර්ගෝපදේශවල සඳහන්.

ඔස්ට්‍රේලියාවෙන් වාර්තා වන ඩෙංගු රෝගීන්ගෙන් බහුතරයක් ඉන්දුනීසියාව, තායිලන්තය, ඉන්දියාව, වියට්නාමය සහ ෆීජි වැනි ඩෙංගු අවදානම අධික රටවල සංචාරය කර පැමිණි අය වෙනවා.

මූලාශ්‍රය - The Australian
Related recommendation
Hiru TV News | Programmes