General16 October 2026

මිහින්තලා සෑයේ චූඩ මාණික්‍යයට පොලිස් ආරක්ෂාව නෑ : මිහින්තලේ හිමියන්ගෙන් බරපතළ හෙළිදරව්වක් සහ හඬපටයක් එළියට

මිහින්තලා මිහිඳු මහා සෑය උදෙසා තායිලන්තයෙන් පරිත්‍යාගයක් ලෙස ලැබුණු, ලක්ෂ 1,170ක් වටිනා චූඩ මාණික්‍යය සහ කොත් කැරැල්ල සඳහා නියමිත පරිදි පොලිස් ආරක්ෂාව ලබා නොදීම සම්බන්ධයෙන් මිහින්තලේ විහාරාධිපති පූජ්‍ය වලවාහැංගුණවැවේ ධම්මරතන හිමියන් දැඩි විරෝධය පළ කර සිටිනවා.

උන්වහන්සේ සඳහන් කරන්නේ පුරාවිද්‍යා දෙපාර්තමේන්තුවේ සම්පූර්ණ අනුමැතිය සහ අධීක්ෂණය යටතේ සිදුකරන මෙම පූජනීය කටයුත්ත සඳහා ආරක්ෂාව ඉල්ලා සිටියද, අදාළ නිලධාරීන්ගෙන් යහපත් ප්‍රතිචාරයක් නොලැබුණු බවයි.

ආරක්ෂාව නොමැතිවීම හේතුවෙන් තමන් වහන්සේට චූඩ මාණික්‍යය එම ස්ථානයෙන් ඉවත් කර ගැනීමට පවා සිදු වූ බව උන්වහන්සේ වැඩිදුරටත් සඳහන් කරනවා.

එමෙන්ම, මෙම ආරක්ෂක අඩුපාඩුව පිළිබඳව මාධ්‍යවේදියෙකු විසින් මහජන ආරක්ෂක අමාත්‍යාංශයේ ලේකම්වරයාගෙන් විමසූ අවස්ථාවේදී, ලේකම්වරයා විසින් ඒ සම්බන්ධයෙන් නොගැලපෙන ලෙස අදහස් දක්වා ඇති බවට චෝදනා කරමින් ඒ හා සබැඳි හඬපටයක් ද උන්වහන්සේ මාධ්‍ය වෙත නිකුත් කරනු ලැබුවා.

තමන්ගේ හෝ අදාළ තරුණ මාධ්‍යවේදියාගේ ජීවිතයට යම් උපද්‍රවයක් හෝ හානියක් සිදුවුවහොත් ඊට මහජන ආරක්ෂක අමාත්‍යාංශයේ ලේකම්වරයා වගකිව යුතු බවත්, මෙම තත්ත්වයට එරෙහිව නැගී සිටින ලෙස සමස්ත ශ්‍රී ලාංකික ජනතාවගෙන් සහ ශ්‍රී ලංකා නීතිඥ සංගමයෙන් ඉල්ලා සිටින බවත් මිහින්තලේ හිමියන් වැඩිදුරටත් ප්‍රකාශ කළා.
Related recommendation
Hiru TV News | Programmes