ඉරාන තෙල් ආනයනය සඳහා ශ්‍රී ලංකාවට සහනයක්.

ඉරාන තෙල් ආනයනය සඳහා ඇමරිකාව විසින් පනවා ඇති ජාත්‍යන්තර සම්බාධක අද (05) නැවතත් දීර්ඝ කිරීමට නියමිතයි. සය මසක් සඳහා ක්‍රියාත්මක වන මෙම සම්බාධක අද යලි දීර්ඝ කළ ද, ශ්‍රී ලංකාව ඇතුළු රටවල් 9 කට එහිදී සහනයක් ලබාදීමට ඔබාමා පරිපාලනය තීරණය කර ඇති බව, එහි ඉහළ පෙලේ නිලධාරියෙකු ජාත්‍යන්තර ප්‍රවෘත්ති සේවා වෙත ප්‍රකාශ කර තිබෙනවා. ඉන්දියාව, චීනය සහ ශ්‍රී ලංකාව ඇතුළු එම රටවල් ඉරාන තෙල් ආනයනය කැපී පෙනෙන ලෙස සීමා කිරීම නිසයි එම සහනය හිමිවන්නේ. මෙරට ක්‍රියාත්මක එකම ඉන්ධන පිරිපහදුව වන සපුගස්කන්ද පිරිපහදුව සඳහා ඉරාන බොරතෙල් අත්‍යාවශ්‍යයි. සම්බාධක හේතුවෙන් ඉරාන තෙල් වෙනුවට විවිධ රටවලින් ආනයනය කෙරෙන තෙල් යොදාගෙන එය ක්‍රියාත්මක කිරීමට උත්සාහ ගැණුනා. ඉරාන න්‍යෂ්ටික වැඩපිළිවෙල ඉලක්ක කරගෙන මෙම ඇමරිකානු සම්බාධක ක්‍රියාත්මකයි.