SpaceX හි Starship රොකට්ටුව ප්‍රථම වරට පෘථිවි කක්ෂය වෙත යැවීමට සූදානම්: අභ්‍යවකාශ ක්ෂේත්‍රයේ නව කඩඉමකට මගපෑදෙයි

ලොව මෙතෙක් නිෂ්පාදනය කර ඇති බලගතුම රොකට් පද්ධතිය වන SpaceX සමාගමේ 'Starship' හි ප්‍රථම පෘථිවි කක්ෂීය පරීක්ෂණ පියාසර කිරීම සිදුකිරීමට සියලු කටයුතු සූදානම් කර තිබෙනවා.

විදෙස් මාධ්‍ය වාර්තා කළේ, හෙට (28) පෙ.ව. 8:15 ට (නැගෙනහිර වේලාවෙන්) විවෘත වන විනාඩි 75 ක කාල රාමුව තුළ මෙම දියත් කිරීම සිදුකිරීමට නියමිත අතර, මෙය සාර්ථක වුවහොත් Starship හි පරීක්ෂණ අදියර නිම වී සක්‍රීය මෙහෙයුම් අදියර ආරම්භ වනු ඇති බවයි.

මෙම පියාසර කිරීමේදී නව පරම්පරාවේ Starlink අන්තර්ජාල උපග්‍රහණ කාණ්ඩයක් ප්‍රථම වරට කක්ෂගත කිරීමටද සැලසුම් කර තිබෙනවා.

කෙසේවෙතත්, මීට පෙර සිදුකළ උප-කක්ෂීය (suborbital) පරීක්ෂණ පියාසර කිරීම්වලට වඩා වැඩි අවදානමක් මෙහිදී පවතින බවයි විද්‍යාඥයෝ පෙන්වා දෙන්නේ.

මීට පෙර සිදුකළ පරීක්ෂණ 13 දී රොකට්ටුවේ පාලනය ගිලිහුණද එය ස්වයංක්‍රීයවම පෘථිවි වායුගෝලයට ඇතුළු වී සාගරයට පතිත වන පරිදි සැලසුම් කර තිබුණා.

නමුත් කක්ෂීය පථයකදී අධික වේගයෙන් ගමන් කරන බැවින් පාලනය ගිලිහුණහොත් එය අභ්‍යවකාශයේ පාවෙන තත්ත්වයට පත්වී අනෙකුත් සක්‍රීය උපග්‍රහණ සමග ගැටීමේ අවදානමක් පවතින අතර, පැය 10 ක පමණ කාලයක් පුරා පැවැත්වීමට නියමිත මෙම මෙහෙයුමේදී Starship යානය පෘථිවිය වටා වට 6 ක් ගමන් කිරීමෙන් අනතුරුව චිලී වෙරළට ඔබ්බෙන් වූ පැසිෆික් සාගරයට පතිත කිරීමට නියමිතයි.

නාසා (NASA) ආයතනයේ 'Artemis' වැඩසටහන යටතේ නැවත වරක් ගගනගාමීන් සඳ මතට ගෙන යාමේ කොන්ත්‍රාත්තුව හිමිව ඇත්තේද Starship යානයට වන අතර, අනාගතයේදී අඟහරු මත මිනිස් ජනාවාස පිහිටුවීමේ ඉලෝන් මස්ක්ගේ අභිප්‍රාය සාක්ෂාත් කරගැනීම සඳහා මෙම පරීක්ෂණ පියාසර කිරීම තීරණාත්මක පියවරක් වනු ඇති බවයි විදෙස් මාධ්‍ය වාර්තාවේ සඳහන්.

මූලාශ්‍රය - CNN