එන්ජින් දෝෂය පරාජය කරමින් Starship කක්ෂයට: ආපසු එද්දී ශාන්තිකර සාගරයේදී පිපිරී යයි

ඉලෝන් මස්ක්ගේ SpaceX සමාගම විසින් නිෂ්පාදිත දැවැන්තම රොකට් යානය වන 'Starship', අත්හදා බැලීමේදී ප්‍රථම වතාවට සාර්ථකව පෘථිවි කක්ෂය වෙත ළඟා වීමට සමත් වුණා.

ගුවන්ගත වීමේදී සිදුවූ නොසිතූ එන්ජින් අක්‍රිය වීමක් හමුවේ වුවද යානය සිය ගමන අත්නොහැර සාර්ථකව කක්ෂයට පිවිසීමට සමත් වීම විශේෂත්වයක්.

කෙසේවෙතත්, කක්ෂයේ සිට ආපසු පැමිණීමේදී ශාන්තිකර සාගරය වෙත සිදුකළ පාලිත ගොඩබැස්වීම (controlled landing) අතරතුරදී මෙම යානය හදිසියේම විශාල ගිනිජාලාවක් සහිතව පිපිරී විනාශ වී තිබෙනවා.

මෙම යානයේ මිනිසුන් කිසිවෙකුත් ගමන් නොකළ අතර, පිපිරීමට ලක්වීමට පෙර අභ්‍යවකාශයේදී චන්ද්‍රිකා කිහිපයක් සාර්ථකව කක්ෂගත කිරීමටද මෙම මෙහෙයුම සමත් වූ බවයි SpaceX සමාගම ප්‍රකාශ කරන්නේ.

අනාගතයේදී අඟහරු සහ චන්ද්‍රයා වෙත මිනිසුන් මෙන්ම භාණ්ඩ ප්‍රවාහනය කිරීමේ අභිලාෂයෙන් ක්‍රියාත්මක වන මෙම Starship ව්‍යාපෘතියේ වැදගත් ඉදිරි පියවරක් ලෙස මෙම පරීක්ෂණ මෙහෙයුම සැලකෙනවා.