'Scooby-Doo: Origins' - நெட்பிளிக்ஸ் வெளியிடும் புதிய நேரடித் தொடர் பற்றிய சுவாரஸ்யமான தகவல்கள்!

நெட்ப்ளிக்ஸ் (Netflix) ஓடிடி தளத்தில் 2027ஆம் ஆண்டு ஒளிபரப்பாகவிருக்கும் 'Scooby-Doo: Origins' என்ற நேரடித் தொடர் பற்றிய, இதுவரை வெளிவராத பல சுவாரஸ்யமான தகவல்கள் அதிகாரப்பூர்வமாக வெளியிடப்பட்டுள்ளன.

50 ஆண்டுகளுக்கும் மேலான ஸ்கூபி-டூ (Scooby-Doo) வரலாற்றையே மாற்றியமைக்கும் வகையில், இதுவரை நாம் கார்ட்டூன் அல்லது கணினி அனிமேஷன் (CGI) மூலம் பார்த்த 'ஸ்கூபி-டூ' கதாபாத்திரத்திற்குப் பதிலாக, உண்மையான நாய் ஒன்றை இந்த கதாபாத்திரத்திற்காகப் பயன்படுத்தும் முதல் சந்தர்ப்பம் இதுவாகும்.

வெளியிடப்பட்டுள்ள புதிய முன்னோட்டக் காணொளியின்படி (Trailer), தனது புகழ்பெற்ற நீல-பச்சை நிற கழுத்துப் பட்டையை (Teal collar) அணிந்திருக்கும் இந்த நாய் குட்டியும், அதன் சிறந்த நண்பனான 'ஷாகி' (Shaggy) என்பவரும் ஒரு காட்டிற்குள் முதன்முதலில் சந்தித்துக் கொள்ளும் காட்சி மிகவும் கவர்ச்சிகரமான முறையில் சித்தரிக்கப்பட்டுள்ளது.

முக்கிய கதாபாத்திரங்களில் நடிக்கும் பிரபலங்கள் (Cast):

இந்தத் தொடரில் நடிக்கும் முன்னணி இளம் நடிகர், நடிகைகளின் விபரங்களும் அதிகாரப்பூர்வமாக அறிவிக்கப்பட்டுள்ளன:

ஷாகி - டானர் ஹேகன் (Tanner Hagen)

டாப்னி - மெக்கென்னா கிரேஸ் (Mckenna Grace)

வெல்மா - அப்பி ரைடர் ஃபோர்ட்சன் (Abby Ryder Fortson)

ஃப்ரெட் - மேக்ஸ்வெல் ஜென்கின்ஸ் (Maxwell Jenkins)

இவர்களுடன் பிரபல ஹாலிவுட் நடிகர் போல் வால்டர் ஹவுசர் (Paul Walter Hauser) என்பவரும் இதில் ஒரு முக்கிய கதாபாத்திரத்தில் இணைந்துள்ளார்.

கதையின்படி, ஷாகியும் டாப்னியும் தங்களது கோடைகால இறுதி நாட்களைக் கழித்துக் கொண்டிருக்கும் போது, ஒரு மர்மமான கொலைச் சம்பவத்திற்கு சாட்சியாக இருந்த ஒரு பரிதாபகரமான 'கிரேட் டேன்' (Great Dane) ரக நாய் குட்டியை சந்திக்கிறார்கள்.

அதன் பிறகு, வெல்மா மற்றும் குழுவில் புதிதாக இணையும் ஃப்ரெட் ஆகியோருடன் இணைந்து, அவர்கள் எதிர்கொள்ளும் முதல் பயங்கரமான மர்மத்தை எவ்வாறு தீர்க்கிறார்கள் என்பதும், அதன் மூலம் புகழ்பெற்ற 'Mystery Inc.' குழு எவ்வாறு உருவாகிறது என்பதும் இந்தத் தொடரில் விரிவாகக் காட்டப்படவுள்ளது.

புகழ்பெற்ற 'Hanna-Barbera' கார்ட்டூன் கதாபாத்திரங்களை அடிப்படையாகக் கொண்டு உருவாக்கப்படும் இந்த பிரமாண்டமான தொடரின் படப்பிடிப்பு பணிகள் கடந்த ஏப்ரல் மாதம் அமெரிக்காவின் அட்லாண்டா (Atlanta) நகரில் ஆரம்பமாகின.

ஜோஷ் ஆப்பிள்பாம் (Josh Appelbaum), ஸ்காட் ரோசன்பெர்க் (Scott Rosenberg) மற்றும் கிரெக் பெர்லாண்டி (Greg Berlanti) உள்ளிட்ட பிரபல ஹாலிவுட் திரைப்பட தயாரிப்பாளர்கள் பலர் இதன் நிர்வாக தயாரிப்பாளர்களாக (Executive Producers) பங்களிக்கின்றனர்.