ජනපති ගෝඨාභය රාජපක්ෂගේ ඇමරිකානු පුරවැසිභාවය ඉවත් කළ බව එරට ෆෙඩරල් දෙපාර්තමේන්තුව නිවේදනය කරයි (වීඩියෝ)

අමෙරිකා එක්සත් ජනපදය විසින් නිකුත් කරන එරට පුරවැසිභාවය ඉවත් කරගැනීමේ නවතම නාමලේඛනයට ජනාධිපති ගෝඨාභය රාජපක්ෂ මහතාගේ නම ඇතුළත් වී තිබෙනවා.

ජනාධිපතිවරයාගේ පුරවැසිභාවය සම්බන්ධයෙන් පසුගිය ජනාධිපතිවරණ සමයේදී දැඩි මතභේදාත්මක තත්ත්වයක් ද උද්ගත වුණා.

ජනාධිපති ගෝඨාභය රාජපක්ෂ මහතාගේ අමෙරිකා එක්සත් ජනපද පුරවැසි භාවය සම්බන්ධයෙන් දැඩි කතාබහක් දේශපාලන කරලිය තුළ මතුවුණේ ඔහු ශ්‍රී ලංකා පොදුජන පෙරමුණේ ජනාධිපති අපේක්ෂක ලෙස ඉදිරිපත්වන බවට නිල වශයෙන් දැනුම්දීමත් සමඟයි.

ගෝඨාභය රාජපක්ෂ මහතා සිය අමෙරිකානු පුරවැසිභාවය ඉවත්කර ගැනීම සම්බන්ධයෙන් පසුගිය වසරේ මාර්තු මාසය වන විටත් මෙරට අමෙරිකානු තානාපති කාර්යාලය දැනුවත් කර තිබුණා.

කෙසේවෙතත් ගෝඨාභය රාජපක්ෂ මහතාගේ ජනාධිපතිධුර අපේක්ෂකත්වය අභියෝගයට ලක් කරමින් සිවිල් සංවිධාන නියෝජිතයින් වන ගාමිණී වියන්ගොඩ සහ චන්ද්‍රගුප්ත තේනුවර යන මහත්වරුන් අභියාචනාධිකරණයට පෙත්සමක් ගොනුකළා.

ඒ ඔහුගේ මෙරට පුරවැසිභාවය පිළිබඳ තර්කයක් මතු කරමින්.

පෙත්සම විමසා බැලුණේ, යසන්ත කෝදාගොඩ, අර්ජුණ ඔබේසේකර සහ මහින්ද සමයවර්ධන යන ත්‍රිපුද්ගල විනිසුරු මඩුල්ල හමුවේයි.
 
පසුගිය ඔක්තෝබර් මස 4 වැනිදා පෙත්සම විභාගයට ගත් විනිසුරු මඩුල්ල පෙත්සම නිශ්ප්‍රභ කරමින් ගෝඨාභය රාජපක්ෂ මහතාගේ ජනාධිපතිධුර අපේක්ෂකත්වය තහවුරු කළා.

මේ අතර අමෙරිකා එක්සත් ජනපදය විසින් සිය රටේ ආදායම් බදු ගෙවීමෙන් නිදහස්වන්නන්ගේ නවතම නාමලේඛණය පසුගිය 24 වැනිදා ප්‍රකාශයට පත්කර තිබෙනවා.

අමෙරිකා එක්සත් ජනපදයේ බදු ගෙවන්නන්ගේ ලේඛණයෙන් ඉවත්වීම එහි පුරවැසිභාවයෙන් ඉවත්වීම ලෙසද සලකන බව එම ලේඛනයේම සඳහන් කර තිබෙනවා.