අකුණු සහ තද සුළං එනවා පරිස්සම් වෙන්න

වායුගෝලයේ කැළඹිලි තත්ත්වය උත්සන්න වී ඇති බැවින්, ගිගුරුම් සහිත වැසි සමඟ ඇතිවිය හැකි තාවකාලික තද සුළංවලින් සහ අකුණු මඟින් සිදු වන අනතුරු අවම කර ගැනීමට අවශ්‍ය සියලු පියවර ගන්නා ලෙස කාලගුණ විද්‍යා දෙපාර්තමේන්තුව ජනතාවගෙන් ඉල්ලා සිටිනවා.

විශේෂයෙන්ම, ගිගුරුම් සහිත වැසි ඇති වන අවස්ථාවලදී විවෘත ස්ථානවල හෝ ගස් යට රැඳී නොසිට ආරක්ෂිත ස්ථාන කරා යොමු වන ලෙසත්, විදුලි උපකරණ භාවිතයෙන් වැළකී සිටින ලෙසත් ජනතාවට උපදෙස් ලබා දී තිබෙනවා.

දිවයිනට නැගෙනහිර දෙසින් පහළ වායුගෝලයේ පවතින මෙම කැළඹිලි ස්වභාවය ඉදිරි පැය 24 තුලදී අඩු පීඩන කලාපයක් දක්වා වර්ධනය වීමේ හැකියාවක් පවතින බව කාලගුණ විද්‍යා දෙපාර්තමේන්තුව වැඩිදුරටත් සඳහන් කරනවා. එහි බලපෑම හේතුවෙන් දැනටමත් දිවයිනේ බොහෝ ප්‍රදේශවල අහස වලාකුළින් බරව පවතිනවා.

කාලගුණ අනාවැකි අනුව, බස්නාහිර, සබරගමුව, මධ්‍යම, වයඹ, දකුණු සහ උතුරු පළාත්වල විටින් විට වැසි හෝ ගිගුරුම් සහිත වැසි ඇති වීමේ ප්‍රවණතාවක් ඇති අතර මෙම පළාත්වල ඇතැම් ස්ථානවල මි.මී. 100ට වැඩි ඉතා තද වැසි ඇති විය හැකි බැවින් ගංවතුර හා නායයෑම් අවදානම් පිළිබඳවද සැලකිලිමත් විය යුතුයි.