මීගමුව මාරක අනතුරෙන් පසු කන්ටේනරයට ගිනි තැබූ තරුණයන් 3ක් අත්අඩංගුවට

මීගමුව - මිනුවන්ගොඩ මාර්ගයේ 2 කණුවත් 3 කණුවත් අතර බොලවලාන ප්‍රදේශයේදී මාර්ගය හරහා හරවමින් තිබූ කන්ටේනර් රථයක ගැටී මීගමුව දෙසට වේගයෙන් ධාවනය කරමින් තිබූ යතුරුපැදි යුගලක ගමන්ගත් පැදිකරුවන් දෙදෙනෙකු ජීවිතක්ෂයට පත්වීමේ සිදුවීමට අදාළව කන්ටේනර් රථයට ගිනි තබා අලාභ හානි කිරීම සම්බන්ධයෙන් තිදෙනෙක් අත්අඩංගුවට ගෙන තිබෙනවා.

මෙසේ අත්අඩංගුවට ගෙන ඇත්තේ අවුරුදු 20, 25 සහ 26 වයසේ පසුවන මීගමුව දාගොන්න හා කිඹුලපිටිය ප්‍රදේශයේ පදිංචිකරුවන් තිදෙනෙක්.

එම ප්‍රදේශයේ අතහැර ගොස් තිබූ තවත් යතුරුපැදියක්ද සොයාගෙන පොලිස් භාරයට ගෙන ඇති බව සඳහන්.

අනතුරින් ජීවිතක්ෂයට පත්වූයේ අවුරුදු 18 සහ 20 වයසේ පසුවූ මීගමුව දාගොන්න ප්‍රදේශයේම පදිංචිකරුවන් දෙදෙනෙක්.

අනතුර සිදුවූ අවට CCTV දර්ශන ඇතුළු තොරතුරු මගින් කන්ටේනර් රථයට අනර්ථය සිදුකිරීමට සම්බන්ධ සියලු සැකකරුවන් අත්අඩංගුවට ගැනීම සඳහා තවදුරටත් විමර්ශන සිදුකෙරෙනවා.