නීතිඥ සංගමය ජනපති සමග සාකච්ඡාවේ සම්පූර්ණ වීඩියෝව ඉල්ලයි

ශ්‍රී ලංකා නීතිඥ සංගමය විසින් අගෝස්තු 12 වැනිදා ජනාධිපතිවරයා සමග පැවති සාකච්ඡාවේ සම්පූර්ණ, සංස්කරණය නොකළ වීඩියෝ පටිගත කිරීම ලබාදෙන ලෙස ඉල්ලා ජනාධිපති ලේකම් කාර්යාලයේ මාධ්‍ය ඒකකයෙන් ඉල්ලීමක් කර තිබෙනවා.

අගෝස්තු 14 වැනිදා යොමුකර ඇති ලිපියකින් නීතිඥ සංගමය සඳහන් කර ඇත්තේ, එම සාකච්ඡාවට අදාළ වීඩියෝ පටයේ කොටසක් තමන් වෙත ලැබී ඇති නමුත්, එය සම්පූර්ණ පටිගත කිරීම නොවන බවයි.

එම වීඩියෝ පටයෙන් ලබාදී ඇත්තේ, මූලික සාකච්ඡාවේ කොටසක් පමණක් වන අතර, ඇතැම් කොටස්වල ශබ්දයද පැහැදිලි නොවන බව නීතිඥ සංගමය පෙන්වා දී තිබෙනවා.

ඒ අනුව, සාකච්ඡාව පුරා සිදු වූ සියලු අදහස් දැක්වීම්, නිරීක්ෂණ, ප්‍රතිචාර සහ නීතිඥ සංගමයේ නියෝජිත පිරිස විසින් අවසානයේ සිදුකළ ප්‍රකාශ ඇතුළත් සම්පූර්ණ සංස්කරණය නොකළ වීඩියෝ පටිගත කිරීම ලබාදෙන ලෙසයි ඔවුන් ඉල්ලීමක් කර ඇත්තේ.

එම වීඩියෝ පටය හැකි ඉහළම ශ්‍රව්‍ය හා දෘශ්‍ය ගුණාත්මක තත්ත්වයෙන් ලබාදෙන ලෙසද ශ්‍රී ලංකා නීතිඥ සංගමය ඉල්ලා තිබෙනවා.