සිවිල් ආරක්ෂක බලකායේ ස්ථීර පත්වීම් දීමේ වැඩසටහන අත්හිටුවයි

සිවිල් ආරක්ෂක බලකායේ නිලධාරීන්ට ස්ථිර පත්වීම් ලබාදීම සඳහා ඊයේ අම්පාර දිස්ත්‍රික්කයේ ස්ථාන 3 ක සංවිධාන කර තිබූ වැඩසටහනක් මැතිවරණ දෙපාර්තමේන්තුවේ උපදෙස් මත තාවකාලිකව අත්හිටවූ බව එම බලකායේ අධ්‍යක්‍ෂ ජෙනරාල්වරයා පවසනවා. සිවිල් ආරක්ෂක නිලධාරීන්ට ස්ථිර පත්වීම් ලබාදීමේ රජයේ වැඩපිලිවෙල යටතේ අම්පාර දිස්ත්‍රික්කයේ නිලධාරීන් 10 000 කට පමණ පත්වීම් ලිපි ලබාදීමේ වැඩසටහනකුයි මෙලෙස සංවිධාන කර තිබුණේ. හදිසියේම මෙම වැඩසටහන නවතා දැමීම හේතුවෙන් තමන් දැඩි අපහසුතාවට පත්වූ බව අම්පාර දිස්ත්‍රික් සිවිල් ආරක්ෂක බලකායේ නිලධාරීන් කිහිපදෙනෙකු හිරු ප්‍රවෘත්ති අංශයට සඳහන් කළා.

මෙම පත්වීම් ලිපි ප්‍රදානය කිරීම අම්පාර දිස්ත්‍රික්කය නියෝජනය කරන එක්සත් ජාතික පක්ෂ අපේක්ෂකයන්ගේ සහභාගීත්වයෙන් සිදුකිරීමට සූදානම් බවට තොරතුරු ලැබීම නිසා තමන් මේ පිළිබඳව මැතිවරණ කොමසාරිස්වරයා දැනුවත් කළ බවයි අම්පාරේ සන්ධාන අපේක්ෂක සරත් වීරසේකර සඳහන් කළේ. ඔහු මීට පෙර සිවිල් ආරක්ෂක බලකායේ ප්‍රධානියා ලෙසද කටයුතු කරනු ලැබුවා.

එල්ලවන චෝදනා සම්බන්ධයෙන් හිරු ප්‍රවෘත්ති අංශය සිවිල් ආරක්ෂක බලකායේ අධ්‍යක්‍ෂ ජනරාල් චන්ද්‍රරත්න පල්ලේගමගෙන් විමසීමක් කළා. ඔහු කියා සිටියේ මෙම පත්වීම් ලිපි ප්‍රදානය හරහා කිසිදු දේශපාලන පක්ෂයක් හෝ කිසිදු අපේක්ෂකයෙකු ප්‍රවර්ධනය කිරීමේ උත්සාහයක් නොතිබූ බවයි.

මැතිවරණ දෙපාර්තමේන්තුවේ අධීක්ෂණය යටතේ එම පත්වීම් ලබාදීමට බාධාවක් නොමැති බව අම්පාර දිස්ත්‍රික් තේරීම් භාර නිලධාරී තුසිත වනිගරත්නගෙන් අප කළ විමසීමකදී ඔහු සදහන් කළා.