චාවකච්චේරියේ පුපුරණ ද්‍රව්‍ය ගැන පරීක්ෂණ ටී.අයි.ඩ්.යට

මන්නාරම - ඉලූප්පෙයිකඩවෙයි ප්‍රදේශයේ වලදමා තිබූ ආර්.පී.ජී. ගිනි අවියක් ඇතුළු පුපුරණ ද්‍රව්‍ය තොගයක් ඊයේ සොයාගත්තා.

පොලිසිය සදහන් කළේ අධිකරණ නියෝගයකට අනුව මෙම පුපුරණ ද්‍රව්‍ය ගොඩ ගැනීම සිදු කළ බවයි.

පසුගිය යුද සමයේ එල්.ටී.ටී.ය විසින් මේවා වළදමා ඇති බවට අනාවරණ කරගෙන තිබෙනවා.

මේ අතර යාපනය - චාවකච්චේරි - මරවන්පුලව් ප්‍රදේශයේ නිවසක් තුළ තිබී අධිබලැති පුපුරණ ද්‍රව්‍ය තොගයක් සොයා ගැනීමේ සිද්ධියට අදාළ පරීක්ෂණ ත්‍රස්ත විමර්ශන කොට්ඨාශයට භාරදී තිබෙනවා.

සිද්ධිය සම්බන්ධයෙන් අත්අඩංගුවට ගත් සැකකරුගෙන් සිදුකළ ප්‍රශ්න කිරීම්වලින් හෙළිවී ඇත්තේ අදාළ පුපුරණ ද්‍රව්‍ය මසුන් මැරීම සඳහා ළඟ තබාගෙන සිට ඇති බවයි.

කෙසේ වෙතත් ඔහුට ඒවා ලැබුණේ කෙසේද යන්න පිළිබඳව තවමත් අනාවරණ වී නැහැ.

එමෙන්ම ඔහු එල්.ටී.ටී.ඊ. සංවිධානයට සම්බන්ධ වී සිටියේද යන්න පිළිබඳව තවමත් අනාවරණ වී නොමැති බවයි උතුර පළාතේ ජ්‍යෙෂ්ඨ පොලිස් නිලධාරියෙකු හිරු ප්‍රවෘත්ති අංශයට සඳහන් කළේ.

මරවන්පුලව් ප්‍රදේශයේ අතහැර දමා තිබූ නිවසක තිබී මරාගෙන මැරෙන ඇදුම් කට්ටලයක්, ක්ලේමෝ බෝම්බ 4 ක්, ටී.එන්.ටී පුපුරණ ද්‍රව්‍ය අඩංගු පාර්සල් 3 ක්, මිලිමීටර් 9 පතොරම් 100 ක් සහ බැටරි පැක් 2 ක්, පොලීසිය ඊයේ සොයා ගත්තා.

අදාළ නිවස තුළ ගංජා සඟවා ඇති බවට පොලීසියට පැමිණිල්ලක් ලැබී තිබුණා. එම අවස්ථාවේදී සිදුකළ පරීක්ෂාකිරීම්වලදියි මෙම පුපුරණ ද්‍රව්‍ය තොගය හමුවී ඇත්තේ.

කෙසේ වෙතත් ඒ වනවිට නිවසේ හිමිකරු ප්‍රදේශය අතහැර පලාගොස් තිබුණා.

පසුව සිදුකරන ලද පරීක්ෂණවලදි ඔහුගේ බිරිඳ අත්අඩංගුවට ගත් අතර ඉන් අනතුරුවයි සැකකරු කිලිනොච්චිය අක්කරායන්කුලම් ප්‍රදේශයේ රැදී සිටියදී අත්අඩංගුවට ගත්තේ.

දර කැපීමට යන බව පවසමින් ඇතැම් පුද්ගලයින් පසුගිය යුද සමයේ එල්.ටී.ටී.ඊ. ය විසින් වළ දැමූ පුපුරණ ද්‍රව්‍ය ගොඩගන්නා බවටද පොලිස් ස්ථාන වෙත තොරතුරු වාර්තාවී තිබෙනවා.    

කෙසේ වෙතත් ආරක්ෂක ලේකම් කරුණාසේන හෙට්ටිආරච්චි කොළඹ ඊයේ පැවති මාධ්‍ය හමුවකට එක්වෙමින් කියා සිටියේ යුද්ධය පැවති ප්‍රදේශවලින් මෙවැනි පුපුරණ ද්‍රව්‍ය සහ යුද උපකරණ හමුවීම සාමාන්‍ය තත්ත්වයක් බවයි.

එය ජාතික ආරක්ෂාවට කිසිසේත් තර්ජනයක් නොවන බවද ඔහු එහිදී සඳහන් කළා.