විමල්ට යළිත් පොලිසියෙන් කැඳවීමක්

යළි තංගල්ල පොලිසිය වෙත පැමිණ අද (12) දිනයේදී ප්‍රකාශයක් ලබාදෙන්නැයි, ජාතික නිදහස් පෙරමුණේ නායක හිටපු අමාත්‍ය විමල් වීරවංශට පොලිසිය දැනුම් දී තිබෙනවා.

කෙසේ වෙතත්, අද දිනයේ පැමිණීමට නොහැකි බව පොලිසියට දැනුම් දුන් බවයි හිටපු අමාත්‍ය විමල් වීරවංශ හිරු ප්‍රවෘත්ති අංශයට සඳහන් කළේ.

ඒ අනුව, ඉදිරි දිනයකදී පොලිසියට පැමිණෙන බව දැනුම් දුන් බවත් ඔහු කියා සිටියා.

මේ අතර, “පුවක්දණ්ඩාවේ සනා” නමැති පුද්ගලයාගේ දේශපාලන සම්බන්ධතා පිළිබඳව තංගල්ල කොට්ඨාස අපරාධ විමර්ශන කාර්යාලයට තමා ලබා දුන් ප්‍රකාශය විකෘති කර ප්‍රසිද්ධ කිරීම සම්බන්ධයෙන් ජාතික පොලිස් කොමිසමට පැමිණිලි කරන අතර අධිකරණ ක්‍රියාමාර්ගද ගන්නා බව හිටපු අමාත්‍ය විමල් වීරවංශ ප්‍රකාශ කළා.

ඔහු මේ බව සඳහන් කළේ සිය ප්‍රකාශය සම්බන්ධයෙන් පොලිස් මාධ්‍ය කොට්ඨාසය පසුගියදා නිකුත් කළ නිවේදනයට ප්‍රතිචාර දැක්වීමට කොළඹ ඊයේ කැඳවා තිබූ ප්‍රවෘත්ති සාකච්ඡාවේදීයී.

තංගල්ල සීනිමෝදර ප්‍රදේශයේදී සොයාගත් මත්ද්‍රව්‍ය තොගය මෙරටට රැගෙන ඒම සම්බන්ධයෙන් සැකපිට අත්අඩංගුවට ගත් සනත් වීරසිංහ හෙවත් පුවක්දණ්ඩාවේ සනා නමැත්තාගේ දේශපාලන සම්බන්ධතා පිළිබඳව, ජාතික නිදහස් පෙරමුණේ නායක විමල් වීරවංශ පසුගියදා අදහස් පළ කර තිබුණා.

ඒ පිළිබඳව ප්‍රකාශයක් ලබාගැනීම සඳහා කළ කැඳවීමකට අනුව විමල් වීරවංශ පසුගියදා තංගල්ල කොට්ඨාස අපරාධ විමර්ශන කාර්යාලයට පැමිණ පැය දෙක හමාරකට ආසන්න කාලයක් ප්‍රකාශයක් ලබාදුන්නා.

එවැනි පසුබිමක හිටපු අමාත්‍ය විමල් වීරවංශ එම ප්‍රකාශයේදී පිළිතුරු ලබාදුන් ආකාරය දක්වමින් පොලිස් මාධ්‍ය කොට්ඨාසය නිවේදනයක් නිකුත් කළේ පෙරේදා දිනයේයි.

ඒ අනුව පුවක්දණ්ඩාවේ සනා නමැත්තාව තමා කිසිදිනෙක හමුවී නොමැති බවත්, ඔහු ජනතා විමුක්ති පෙරමුණේ ක්‍රියාකාරී සාමාජිකයෙකු ලෙස හඳුනාගෙන නොමැති බවත් විමල් වීරවංශ පවසා ඇතැයි එහි සඳහන් වුණා.

එමෙන්ම, මත්ද්‍රව්‍ය රැගෙන පැමිණි බෝට්ටුවේ හිමිකරු පුවක්දණ්ඩාවේ සනා බව තමා පැවසුවේ එම දිනවල මාධ්‍ය මගින් අනාවරණ කළ කරුණු මත බව හිටපු අමාත්‍ය විමල් වීරවංශ පවසා ඇතැයි එම නිවේදනයේ ප්‍රකාශ කර තිබුණා.

දැන දැනම අසත්‍ය බව දන්නා වූ හෝ අසත්‍ය බව විශ්වාස කරන්නා වූ යම් තොරතුරක් හෝ යම් කරුණක් ප්‍රකාශ කිරීම සම්බන්ධව අධිකරණයට කරුණු වාර්තා කර ඉදිරි නීතිමය කටයුතු සිදුකරන බවයි එම නිවේදනයේ තවදුරටත් දැක්වුණේ.