පැල්වත්ත හා සෙවනගල සීනි ඉන්දියාවට ලබාදීමට යන බවට විමල්ගෙන් චෝදනා

වත්මන් රජය පැල්වත්ත සහ සෙවනගල සීනි කර්මාන්ත ශාලා දෙක උවමනාවෙන්ම උපක්‍රමිකව පාඩු ලබන තත්ත්වයකට පත්කර ඉන්දියානු සමාගමකට කුණුකොල්ලෙට විකිණීමේ මහා කුමන්ත්‍රණයක් ක්‍රියාත්මක වෙමින් පවතින බව ජාතික නිදහස් පෙරමුණේ නායක හිටපු පාර්ලිමේන්තු මන්ත්‍රී විමල් වීරවංශ අද (29) බත්තරමුල්ල සිය ප්‍රධාන කාර්යාලයේ පැවැති මාධ්‍ය සාකච්ඡාවකදී අනාවරණය කළා.


එහිදී වැඩිදුරටත් අදහස් දැක්වූ විමල් වීරවංශ


පැලවත්ත සීනි සමාගමට අයත් සේවකයන් විසින්ම වගා කරන හෙක්ටයාර 47ක කොටසක් පසුගිය සැප්තැම්බර් 30 දා ගින්නකින් විනාශ වුණා.

මෙම ගින්නෙන් මෙට්‍රික් ටොන් 3,000ක උක් නිෂ්පාදනය පිළිස්සුණා.

කර්මාන්ත විශේෂඥයන්ට අනුව, ගින්නෙන් පැය 72ක් ඇතුළත එම උක් කපා ඇඹරීමෙන් හානිය අවම කළ හැකිව තිබුණා.

නමුත් සභාපතිනි සඳමාලි චන්ද්‍රසේකර මහත්මිය එම ක්‍රියාමාර්ගයට බාධා කළ බව බවත් එමඟින් සිදුවූ පාඩුව රුපියල් මිලියන 111.2ක බවත් මෙම සාකච්ඡාවේදී හෙළි වුණා.

මේ ආකාරයටම සෙවනගල සීනි කර්මාන්ත ශාලාවේ වගා බිම් කඩක් ගින්නට හසුවී විනාශ වූ අතර එයින්ද රුපියල් මිලියන 360.62ක පාඩුවක් සිදුව ඇති බව පෙන්වා දුන් විමල් වීරවංශ මෙම ආයතන දෙකෙන්ම සිදුව ඇති මුළු පාඩුව රු. මිලියන 641.81බව පෙන්වා දුන්නා.

සාමාන්‍යයෙන් නොවැම්බර් මාසයේදී ශාලා දෙකේ වාර්ෂික නඩත්තු කටයුතු සිදුකරනු ලබන පෙබරවාරි මාසයේදී නැවත වැඩ ආරම්භ කෙරෙනවා.

නමුත් මේ වන විට යන්ත්‍රෝපකරණ සඳහා අමතර කොටස් මිලදී ගැනීමට ටෙන්ඩර් කැඳවීමක් සිදුකර නැහැ.

එමගින් ශාලා දෙක ලබන පෙබරවාරි මාසයේදී වැඩ ආරම්භ කිරීමට නොහැකි වනු ඇති බවත්, එමගින් තවදුරටත් පාඩු වැඩිකර ආයතන ඉන්දියානු සමාගමකට විකිණීමට පරිසරය සකස් කරමින් සිටින බවටත් චෝදනා කෙරෙනවා.

පාඩුව තක්සේරු කළ විශේෂඥ නිලධාරීන්ට දඬුවම් ලබා දෙමින්ද රජයේ ජේ.වී.පී. වෘත්තීය සමිති නායකයාට මාසිකව රු. ලක්ෂයකට අධික ඕ.ටී. මුදල් ගෙවීම මගින් වෘත්තීය සමිතිය "හීලෑ" කර තබාගෙන සිටින බවටද චෝදනා එල්ල වුණා.

පර්යේෂණ නිලධාරීන්ගේ වෛද්‍ය දීමනා නතර කර තිබියදී මෙම ඕ.ටී. ගෙවීම සිදුකර ඇති බවත් විමල් වීරවංශ පෙන්වා දුන්නා.

උක් ගොවීන්ගේ ආර්ථික සම්පත වන මෙම ආයතන ආරක්ෂා කිරීම සඳහා ජා.නි.පෙ. වෘත්තීය සමිති ගොවි සංවිධාන සහ දේශපාලන නායකත්වය සූදානම් බව ද විමල් වීරවංශ වැඩිදුරටත් මෙහිදී ප්‍රකාශ කළා.