මිදිගම ඝාතන සැලසුමේ තවත් සැකකරුවෙක් අත්අඩංගුවට

මිදිගම ප්‍රදේශයේ ව්‍යාපාරිකයෙකු ඇතුළු හත් දෙනෙකු ඝාතනය කිරීම සඳහා සැලසුම් කරමින් සිටියදී පලා ගිය තවත් ප්‍රධාන සැකකරුවෙකු අද (23) වැලිගම පොලිසිය විසින් අත්අඩංගුවට ගෙන තිබෙනවා.

අත්අඩංගුවට ගෙන ඇත්තේ මිදිගම ප්‍රදේශයේ පදිංචි, වයස අවුරුදු 38ක් පමණ වන පුද්ගලයෙක් බවයි පොලිසිය සඳහන් කළේ.

එහිදී, මෙම සැකකරු, ඝාතන සැලසුම ක්‍රියාත්මක කිරීමට පැමිණි වෙඩික්කරුවන්ට නවාතැන් පහසුකම් ලබා දුන් පුද්ගලයා බවට හඳුනාගෙන තිබෙනවා.

වැලිගම පොලිසියේ වැඩබලන ස්ථානාධිපති එම්. පී. ජී. නන්දසිරි ඇතුළු නිලධාරී කණ්ඩායමක් විසින් මෙම සැකකරු වැලිගම, ඉබ්බාවල ප්‍රදේශයේදී අත්අඩංගුවට ගැනීමට සමත්වූ බවයි පොලිසිය සඳහන් කළේ.

අත්අඩංගුවට ගැනීමේදී සැකකරු සන්තකයේ තිබී රිවෝල්වර වර්ගයේ ගිනි අවියක්, ජීව උණ්ඩ 6ක්, අත්බෝම්බයක්, ටී 56 වර්ගයේ ගිනි අවියක මැගසින් එකක්, ටී 56 උණ්ඩ 14ක්, සොයා ගැනීමට පොලිසිය හැකි වී තිබෙනවා.

මෙම ව්‍යාපාරිකයා ඇතුළු පවුලේ සාමාජිකයන් ඝාතනය කිරීමට සැලසුම් කරමින් තිබියදී, ඒ පිළිබඳ ලැබුණු තොරතුරක් මත බස්නාහිර උතුර අපරාධ කොට්ඨාශයේ අධ්‍යක්ෂක සහකාර පොලිස් අධිකාරි රොහාන් ඕලුගල ඇතුළු නිලධාරී කණ්ඩායමක් මිදිගම ප්‍රදේශයේ නිවසක් පරීක්ෂාවට ලක් කර තිබෙනවා.

එම අවස්ථාවේදී ටී 56 ගිනි අවියක් සමග යුද හමුදාවේ හිටපු සෙබලෙකු අත්අඩංගුවට ගත් අතර, සැකකරුවන් දෙදෙනෙකු පලා යනු ලැබුවා.

අද අත්අඩංගුවට ගෙන ඇත්තේ එලෙස පලා ගිය එක් සැකකරුවෙක් බවයි පොලිසිය පැවසුවේ.

අත්අඩංගුවට ගන්නා ලද සැකකරු හෙට (24) දින මාතර අධිකරණයට ඉදිරිපත් කොට රැඳවුම් නියෝග ලබා ගැනීමට නියමිත බව වැලිගම පොලිසිය වැඩිදුරටත් සඳහන් කළා.