ගොඩබාන්න යද්දී ගුවන් යානයක් කඩාවැටෙයි

උතුරු කැරොලිනාවේ අයර්ඩෙල් ප්‍රාන්තයේ ස්ටේට්ස්විල් ප්‍රාදේශීය ගුවන් තොටුපොළේදී ගුවන් යානයක් කඩා වැටුණු බව එම ගුවන්තොටුපළ නිවේදනය කර තිබෙනවා.

විදෙස් වාර්තා පවසන්නේ අද පෙරවරුවේදී යානය ගොඩබෑමට උත්සාහ කරන අතරතුර අනතුර සිදුව ඇති බවයි.

ගුවන් යානය කඩා වැටෙන විට පිපිරීමක් සිදුවී ගිනිදැල්වලින් ඇවිලී ගිය අතර අනතුර සිදු වූ ස්ථානයේ විශාල ගිනි ජාලාවක් විහිදෙන බව වීඩියෝ මගින් පෙනී යයි.

මෙම අනතුර හේතුවෙන් ස්ටේට්ස්විල් හි සැතපුම් ගණනාවක් දුරට දුමාරය දර්ශනය වී තිබෙනවා.

අනතුරෙන් මරණ වාර්තා වන බවට අයර්ඩෙල් ප්‍රාන්තයේ ෂෙරිෆ්වරයා දේශීය මාධ්‍ය වෙත දැනුම් දී තිබුණා.

දේශීය මාධ්‍ය පවසන්නේ දිවි ගලවා ගත් කිසිවෙකු නොමැති බවයි.

කෙසේ වෙතත්, අනතුරට පත් වූ යානයේ කොපමණ පිරිසක් සිටියාද යන්න තවමත් පැහැදිලි නැහැ.

Cessna C550 යානයක් මෙලෙස අනතුරට පත්ව ඇතැයි පැවසෙන අතර එහි සාමාන්‍යයෙන් මගීන් 8ත් 10ත් අතර සංඛ්‍යාවකට ගමන් කළ හැකි බවයි පැවසෙන්නේ.

මෙම සිදුවීම සම්බන්ධයෙන් ෆෙඩරල් ගුවන් සේවා පරිපාලනය (FAA) විසින් පරීක්ෂණයක් ආරම්භ කර තිබෙනවා.