නඩු වාර්තා හපා කෑ නීතිඥවරියකගේ නීතිඥභාවය අහෝසියි

නීතිඥ ආචාර ධර්මවලට නොගැලපෙන ආකාරයෙන් කටයුතු කර නීතිඥවරුන්ගේ වෘත්තීය ආචාර ධර්ම උල්ලංඝනය කිරීමේ චෝදනාවට වරදකරු කෙරුණු කැකිරාව ප්‍රදේශයේ සේවයේ නියුතු නීතිඥවරියකගේ නීතිඥභාවය අහෝසි කිරීමට ශ්‍රේෂ්ඨාධිකරණය ඊයේ (16) තීන්දු කළා.

අධිකරණ නියෝගයක් උල්ලංඝනය කර අධිකරණයට අපහාස කිරීම සම්බන්ධයෙන් ඇයට වසරක අත්හිටවූ සිරදඬුවම් නියම කෙරුණා.

ඒ අනුව එම සිර දඬුවම වසර පහකට අත්හිටුවීමට නියම කළ අතර රුපියල් 25,000ක දඩයක් ගෙවන ලෙසද නියම කළ අතර, එම දඩ මුදල නොගෙවන්නේ නම් ඒ වෙනුවෙන් අමතර මාස හයක සිර දඬුවම් නියම කෙරුණා.

අදාල චෝදනාවලට තමන් වරදකාරිය බවට එම තැනැත්තිය පිළිගැනීමෙන් අනතුරුවයි මෙම දඬුවම් නියම කළේ.

එම තැනැත්තියට එරෙහිව ගොනුකර තිබූ පැමිණිල්ල විභාග කිරීමෙන් අනතුරුව ශ්‍රේෂ්ඨාධිකරණ විනිසුරුවරුන්වන අර්ජුන ඔබේසේකර, ප්‍රියන්ත ප්‍රනාන්දු යන එකඟත්වය ඇතිව නඩු තීන්දුව ශ්‍රේෂ්ඨාධිකරණ විනිසුරු යසන්ත කෝදාගොඩ විවෘත අධිකරණය හමුවේ ප්‍රකාශ කළා.

එහිදී ඇයගේ නම නීතිඥ නාමාවලියෙන් ඉවත් කරන ලෙස ශ්‍රේෂ්ඨාධිකරණයේ රෙජිස්ට්‍රාර් වරයාට නියෝග කළා.

මෙම තීරණය ශ්‍රී ලංකා නීතිඥ සංගමයට සහ කැකිරාව දිසා විනිසුරුවරයාට දැනුම් දෙන ලෙසත් නියම කළ අතර, ඇඟිලි සලකුණු ලබාදීම සඳහා පොලිස් අපරාධ හා ඇඟිලි සලකුණු කොට්ටාසය හමුවේ පෙනී සිටින ලෙසද ඇයට නියම කෙරුණා.

කැකිරාව මහේස්ත්‍රාත් අධිකරණ කාර්යාලයේ තිබූ නඩු ගොනුවක් ලබාදීම කාර්යාලයේ සේවකයින් විසින් ප්‍රතික්ෂේප කළ අවස්ථාවේදී 2023 වසරේ ජූලි මස 27 දින එය බලහත්කාරයෙන් උදුරා ගෙන එහි තිබූ අත් අකුරු පරීක්ෂා කිරීම සම්බන්ධයෙන් වන ලේඛනයක් කටේ දමා හපා විනාශ කළ බවට නීතීඥවරියට එරෙහිව චෝදනා කර තිබුණා.

මෙකී සිද්ධිය මගින් අදාළ නීතීඥවරිය විසින් නීතිඥභාවයේ ආචාර්ය ධර්ම උල්ලංඝනය කර ඇති බවට චෝදනා කරමින් නීතිපතිවරයා විසින් ඇයට එරෙහිව චෝදනා පත්‍රයක් ඉදිරිපත් කළා.

එම සිද්ධිය සම්බන්ධයෙන් මෙම නීතිඥවරියටම විරුද්ධව අපරාධ නඩුවක්ද මහේස්ත්‍රාත් අධිකරණයේ විභාග වන බව එහිදී සඳහන් කෙරුණා.

එම පැමිණිල්ල ප්‍රකාශ විභාගයට ගත් ශ්‍රේෂ්ඨාධිකරණය ඇයගේ නීතිඥ භාවය අත්හිටුවීමට ශ්‍රේෂ්ඨාධිකරණය මීට පෙර නියෝග කළා.

එලෙස නීතිඥභාවය අත්හිටුවා තිබියදීත් එම වෘත්තියේ කටයුතු කරමින් සේවා දායකයින්ගේ මුදල් ලබා ගැනීම සිදුකළ බවට කැකිරාව නීතිඥ සංගමය විසින් ඇයට එරෙහිව ඉදිරිපත් කළ පැමිණිල්ලක් සලකා බැලීමෙන් අනතුරුව ඇයට පිටවීම තහනම් කරමින් ශ්‍රේෂ්ඨාධිකරණය නියෝගයක් ද මීට පෙර නිකුත් කර තිබුණා.