ගෙවල් රැසකට සුද්දේ දීපු ''ටික්කා'' මාට්ටු

නාවලපිටිය ප්‍රදේශයේ නිවෙස් රැසක් බිඳ රන් භාණ්ඩ හා මුදල් සොරකම් කළ සැකකරුවෙකු අත්අඩංගුවට ගත් බව නාවලපිටිය පොලිසිය පවසනවා.

සැකකරු නාවලපිටිය කැන්දෝපිටිය  ප්‍රදේශයේ පදිංචි 34 හැවිරිදි  එක්දරු පියෙක් වන මහේෂ් මදුසංක නොහොත් ''ටික්කා'' ලෙස හඳුන්වන අයෙක් බවයි පොලිසිය පැවසුවේ.

ඔහු තදින්ම අයිස් මත්ද්‍රව්‍ය සඳහා ඇබ්බැහි වූවකු බවත් මත්ද්‍රව්‍ය අලෙවි කිරීම, ගෙවල් බිඳුම් ඇතුළු විවිධ වැරදි සඳහා වරෙන්තු නිකුත් කර ඇති සැකකරුවෙකු බවයි වාර්තා වන්නේ.

මොහු ඉකුත් ජනවාරි 22 වැනිදා ඇප මත නිදහස්ව පැමිණි සිටියදී  මෙසේ  නිවාස 08ක් බිඳ රුපියල් ලක්ෂ 35කට ආසන්න රන් භාණ්ඩ සහ රුපියල් 40,000කට ආසන්න මුදල් ප්‍රමාණයක් මෙන්ම ජංගම දුරකථන 04ක් සොරාගෙන ඇති බව අණාවරණය වුණා.

සැකකරු සොරා ගත් රන් භාණ්ඩ සැකකරුගේ නිවස ආසන්නයේ වළදමා තිබියදීයි සොයාගෙන ඇත්තේ.

සොරා ගත් සියලු මුදල්වලින් මත්ද්‍රව්‍ය පානය කළ බවත්, අයිස් මත්ද්‍රව්‍ය පානය කළ පසු තමන්ට නිවසක් බිඳ මුදල් ලබා ගැනීමට සිතුවිලි පහළවන බවත්, සැකකරු පවසා තිබෙනවා.

මොහුට දිනකට අයිස් මත්ද්‍රව්‍ය මිලදී ගැනීමට රැපියල් 8000ක පමණ මුදලක් අවශ්‍ය බවද පොලිසිය හමුවේ ප්‍රකාශ කර තිබුණා.

රාජකාරී සඳහා නිවසින් බැහැර වන රජයේ රැකියාවල නියුතු අයගේ නිවෙස් පිළිබඳ විමසිල්ලෙන් සිට සැකකරු මෙම මංකොල්ලයන් සිදුකර ඇති බවයි විමර්ශනවලදී හෙළිවී ඇත්තේ.