පොලිස් වෙඩි තැබීමෙන් තුවාල ලැබුවේ 'කොස් මල්ලි'ගේ ප්‍රධාන ගෝලයෙක්

බොරලැස්ගමුව ප්‍රදේශයේ නිවසකට තියුණු ආයුධවලින් පහර දී පලායමින් සිටි දෙදෙනකු පොලිස් නිලධාරීන්ටද එම ආයුදවලින් පහරදී පලායෑමට තැත් කිරීමේදී සිදු කළ වෙඩි තැබීමෙන් තුවාල ලබා ඇත්තේ සංවිධානාත්මක අපරාධ සහ මත්ද්‍රව්‍ය ජාවාරම්කරුවෙකු වන කොස් මල්ලි නමැත්තාගේ ගෝලයෙකු බවට පොලිසිය හඳුනාගෙන තිබෙනවා.

අදාළ නිවසට පහරදීමේ සිද්ධිය මත්ද්‍රව්‍ය ආරවුලක් මත සිදුව ඇති බවටයි පොලිසිය සැක කරන්නේ.

සිද්ධිය අතරතුර එක් සැකකරුවෙකු වෙඩි ප්‍රහාරය මැද්දේ පලා ගොස් ඇති බවද බොරලැස්ගමුව පොලිසිය පැවසුවා.

බොරලැස්ගමුව ඕ .පී. පෙරේරා මාවතේ නිවසකට අද අළුයම 1.30 ට පමණ පුද්ගලයන් පිරිසක් යතුරුපැදි දෙකකින් තියුණු ආයුධ රැගෙන පැමිණ නිවසටද පහරදී අලාභ හානිකර නිවසේ නිදා සිටි පුද්ගලයන්ටද පහරදී පලා ගිය බවට බොරලැස්ගමුව පොලිසියට තොරතුරක් ලැබී තිබුණා.

ඔවුන් පිළියන්දල දෙසට පලා යන බවට ලද තොරතුරු අනුව පොලිස් නිලධාරීන් එම ප්‍රදේශයේ සැඟවී සිටියදී ඉදිරියට පැමිණි යතුරුපැදිය ආපසු හැරී යාමට උත්සාහ කර තිබෙනවා.

එම අවස්ථාවේදී පැදිකරු විසින් පොලිස් නිලධාරියකු හප්පා අනතුරට ලක් කර ඇති අතර පසු පැදිකරු තියුණු ආයුධයකින් පොලිස් නිලධාරීන්ට පහරදීමට තැත් කර තිබුණා.

එහිදී පොලිස් නිලධාරියෙකු රාජකාරී ගිනි අවියෙන් එම පුද්ගලයාට වෙඩි ප්‍රහාරයක් එල්ල කිරීමත් සමගම එම පුද්ගලයා යතුරුපැදියෙන් ඇද වැටී ඇති අතර පැදිකරු පලා ගිය බවයි වාර්තා වන්නේ.

මෙම කල්ලිය විසින් නිවසට පහරදීමේදී ආයුධ ප්‍රහාරයකින් තුවාල ලැබූ 24 හැවිරිදි තරුණියකසහ තුවාල ලද පොලිස් නිලධාරියා මෙන්ම බණ්ඩාරගම වීදියගොඩ ප්‍රදේශයේ පදිංචි සැකකරුද ප්‍රතිකාර සඳහා කළුබෝවිල ශික්ෂණ රෝහල වෙත ඇතුළත් කර තිබෙනවා.

බොරලැස්ගමුව හා පිළියන්දල පොලිසිය ඒකාබද්ධව වැඩිදුර විමර්ශන සිදු කරනවා.