ෆේස්බුක් පද්ධතියේ හදිසි බිඳවැටීමක්: ලොව පුරා ගිණුම් රැසක් තාවකාලිකව අක්‍රිය වෙලා

මේ වන විට ලොව පුරා ෆේස්බුක් (Facebook) සමාජ මාධ්‍ය ජාලයේ පද්ධති බිඳවැටීමක් හේතුවෙන් එහි පරිශීලකයන් රැසක් තම ගිණුම් වෙත පිවිසීමට නොහැකිව දැඩි අපහසුතාවයට පත්ව ඇති බවට Newsweek ඇතුළු ජාත්‍යන්තර මාධ්‍ය වාර්තා කර තිබෙනවා.

පද්ධතියේ පවතින තාක්ෂණික දෝෂයක් හේතුවෙන් ගිණුම් තාවකාලිකව අක්‍රිය වී ඇති බවට (temporarily unavailable) වෙබ් අඩවිය සහ යෙදවුම (App) තුළ නිවේදනයක් දර්ශනය වන බව පරිශීලකයෝ පවසන අතර සජීවී අන්තර්ජාල බිඳවැටීම් නිරීක්ෂණය කරනු ලබන 'ඩවුන්ඩිටෙක්ටර්' (Downdetector) වෙබ් අඩවියේ දත්තවලට අනුව, මෙම ගැටලුව ඇමරිකානු වේලාවෙන් අද අලුයම 3:25 ට පමණ ආරම්භ වී තිබෙනවා. විශේෂයෙන්ම අමෙරිකා එක්සත් ජනපදය ඇතුළු රටවල් රැසක දහස් සංඛ්‍යාත පරිශීලකයන් පිරිසක් ෆේස්බුක් පරිශීලනය කිරීමට නොහැකි බවට මේ වන විටත් පැමිණිලි ඉදිරිපත් කරමින් සිටින බවයි ජාත්‍යන්තර මාධ්‍ය වාර්තා කරන්නේ.

ෆේස්බුක් ගිණුම් වෙත පිවිසීමට උත්සාහ කිරීමේදී, "වෙබ් අඩවියේ පවතින ගැටලුවක් හේතුවෙන් ඔබගේ ගිණුම දැනට භාවිත කළ නොහැක.

මෙම දෝෂය නුදුරේදීම විසඳීමට අප බලාපොරොත්තු වන අතර, කරුණාකර මිනිත්තු කිහිපයකින් නැවත උත්සාහ කරන්න" (Your account is currently unavailable due to a site issue...) යනුවෙන් නිල පණිවුඩයක් එහි සටහන් වන අතරම මව් සමාගම වන මෙටා (Meta) ආයතනය විසින් මෙම පද්ධති දෝෂය යථා තත්ත්වයට පත් කිරීම සඳහා කටයුතු කරමින් සිටින බවයි ජාත්‍යන්තර මාධ්‍ය වැඩිදුරටත් වාර්තා කරන්නේ.