05 දෙනෙකුට මරු කැඳවූ හෝමාගම ගින්න ගැන කම්කරු කොමසාරිස්ගෙන් වාර්තාවක් ඉල්ලයි

පුද්ගලයින් 05 දෙනෙකුට මරු කැඳවමින් ගිනිගෙන විනාශ වූ හෝමාගම - කටුවාන කර්මාන්තපුරයේ හෙල්මට් කර්මාන්ත ශාලාව සම්බන්ධයෙන් විමර්ශනයක් සිදු කරන ලෙස කම්කරු කොමසාරිස් ජෙනරාල්වරියට උපදෙස් ලබාදී ඇති බව කම්කරු නියෝජ්‍ය අමාත්‍ය මහින්ද ජයසිංහ ප්‍රකාශ කළා.

එමෙන්ම මේ සම්බන්ධයෙන් පොලිසිය ද විමර්ශනයක් ආරම්භ කර තිබෙනවා.

හෝමාගම, කටුවාන කර්මාන්ත පුරයේ හෙල්මට් නිෂ්පාදන කර්මාන්ත ශාලාවක ඊයේ පෙරවරුවේ හටගත් ගින්නෙන් පුද්ගලයින් පස්දෙනෙකු ජීවිතක්ෂයට පත්වුණා. ශ්‍රී ජයවර්ධනපුර කෝට්ටේ ගිනි නිවීම් ඒකකයේ නිලධාරියෙකු සඳහන් කළේ, ඔවුන්ගේ සිරුරු හඳුනාගත නොහැකි ලෙස පිළිස්සී ඇති බවයි.

අදාළ සිරුරු මේ වනවිට හෝමාගම මූලික රෝහලේ තැන්පත් කර තිබෙනවා. ගින්නට හේතුව විදුලි කාන්දුවක් බවටයි පොලිසිය සැක පළ කරන්නේ. එමෙන්ම, එහි දුම ආඝ්‍රහනය වූ කාන්තාවක් ද එම රෝහලට ඇතුළත් කෙරුණා.

ගින්නෙන් මියගිය පුද්ගලයින් අතර සිටි එක් අයෙකු වසර 20 ක පමණ කාලයක් එම කර්මාන්තශාලාවේ වැඩ පරීක්ෂකවරයකු ලෙස සේවය කර ඇති අතර මියගිය අනෙකුත් හතර දෙනා මීට මාස කිහිපයකට පෙර එහි රැකියාවට පැමිණ ඇති බවයි අනාවරණය වුණේ.

හෝමාගම වැඩබලන මහේස්ත්‍රාත් රොෂාන් කුරුප්පුආරච්චි ඊයේ පස්වරුවේ සිද්ධිය වූ ස්ථානයට පැමිණ ස්ථානීය පරීක්ෂණය සිදු කර තිබුණා.