තැපැල් කාර්යාල නවීකරණයට පසුගිය වසරේදී මිලියන 600ක් වැය කළා - අමාත්‍ය වෛද්‍ය නලින්ද ජයතිස්ස

පසුගිය වසරේදී තැපැල් කාර්යාල නවීකරණ ව්‍යාපෘති 206 ක් සඳහා රුපියල් මිලියන 600 ක් වැය කළ බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස පැවසුවා.

පොළොන්නරුව දිස්ත්‍රික්කයේ ජයන්තිපුර ප්‍රදේශයේ ජනතාවට වඩාත් කාර්යක්ෂම, විධිමත් හා ජනතා හිතකාමී තැපැල් සේවාවක් ලබාදීමේ අරමුණින් සියලු නවීන පහසුකම්වලින් සමන්විතව අභිනවයෙන් ඉදිකරන ලද ජයන්තිපුර නව තැපැල් කාර්යාල ගොඩනැගිල්ල අමාත්‍යවරයාගේ ප්‍රධානත්වයෙන් ඊයේ (25) පස්වරුවේ ජනතා අයිතියට පත් කරමින් ඔහු මේ බව සඳහන් කළා.

නව තැපැල් කාර්යාලය විවෘත කිරීමේ අවස්ථාවට එක්වෙමින් අමාත්‍යවරයා වැඩිදුරටත් කියා සිටියේ, නව තැපැල් කාර්යාල 14 ක් සහ දඹුල්ල ප්‍රාදේශීය හුවමාරු මධ්‍යස්ථානය ඇතුළු ඉදිකිරීම් සඳහා තවත් රුපියල් මිලියන 600 ක් ආයෝජනය කර තිබෙන බවයි.

එමෙන්ම, ප්‍රවාහන පහසුකම් ශක්තිමත් කිරීම සඳහා රුපියල් මිලියන 588 ක් වැය කර නව රථවාහන ලබාදී ඇති අතර, තැපැල් හා උප තැපැල් කාර්යාල ඩිජිටල්කරණය සඳහා රුපියල් මිලියන 74 කට අධික මුදලක් වැය කර පරිගණක, ලැප්ටොප් ඇතුළු නවීන තාක්ෂණික උපකරණ ලබාදී ඇති බවද හෙතෙම පැවසුවා.

තැපැල් සේවාව ලිපි හුවමාරුවට පමණක් සීමා වූ සේවාවක් නොව, ජනතාවගේ දෛනික ජීවිතයට අත්‍යවශ්‍ය මූල්‍ය, සන්නිවේදන හා රාජ්‍ය සේවා පහසුකම් රැසක් සපයන ජනතා කේන්ද්‍රීය සේවා ජාලයක් බව පෙන්වා දුන් අමාත්‍යවරයා, එම සේවාව වඩාත් නවීන, කාර්යක්ෂම හා ජනතාවට සමීප සේවාවක් බවට පත් කිරීම සඳහා රජය අඛණ්ඩව ආයෝජනය කරමින් අවශ්‍ය පියවර ගනිමින් සිටින බවද කියා සිටියා.

මෙම අවස්ථාවට පොළොන්නරුව දිස්ත්‍රික් පාර්ලිමේන්තු මන්ත්‍රී පද්මසිරි බණ්ඩාර, තැපැල්පති රුවන් සත්කුමාර, නියෝජ්‍ය තැපැල්පති (සංවර්ධන) තුසිත හුලංගම, නියෝජ්‍ය තැපැල්පති (උතුරු මැද) සංජීව ප්‍රනාන්දු, ගණකාධිකාරී (මුද්දර) රංජිත් මහකුඹුර, පොළොන්නරුව ප්‍රාදේශීය තැපැල් අධිකාරී සුදත් සිරිසේන, ජයන්තිපුර තැපැල් ස්ථානාධිපති කේ.එල්.ඩී. වීරසේන යන මහත්වරුන් ඇතුළු තැපැල් දෙපාර්තමේන්තුවේ හා ගොඩනැගිලි දෙපාර්තමේන්තුවේ නිලධාරීන්, රාජ්‍ය ආයතන නියෝජිතයන් සහ ප්‍රදේශවාසී ජනතාව විශාල පිරිසක් එක්ව සිටයා.