එල් නිනෝ බලපෑමෙන් දිස්ත්‍රික් රැසකට දැඩි උණුසුම් කාලගුණයක්: වික්ටෝරියාවේ ජල මට්ටම සීඝ්‍රයෙන් පහතට

මේ වනවිට රට තුළ එල් නිනෝ තත්ත්වයක් ස්ථාපිත වී ඇති බව කාලගුණ විද්‍යා දෙපාර්තමේන්තුවේ අනාවැකි අංශයේ අධ්‍යක්ෂ ජනරාල් අජිත් විජේමාන්න පවසනවා.

එය ප්‍රබල එල් නිනෝ තත්ත්වයක් දක්වා වර්ධනය වීමට මීට පෙර තිබූ 63% ක සම්භාවිතාව මේ වන විට ගෝලීය පුරෝකථනයන්ට අනුව 80% ක් දක්වා වර්ධනය වී ඇති බවයි ඔහු වැඩිදුරටත් කියා සිටියේ.

එලෙස ඉතා ප්‍රභල එල් නිනෝ තත්ත්වයක් ඇති වුවහොත් ලබන වසරේ පළමු කාර්තුව තුළ මෙරට තුළ නියඟයක් ඇතිවිය හැකි බව ද ඔහු ප්‍රකාශ කළා.

මේ අතර එල්නිනෝ තත්ත්වයේ බලපෑම හේතුවෙන් මෙරට ප්‍රදේශ රැසකටද පවතින්නේ දැඩි උණුසුම් කාලගුණ තත්ත්වයක්.

උතුර ,උතුරු මැද, නැගෙනහිර පළාත්වලත්, හම්බන්තොට සහ මොණරාගල දිස්ත්‍රික්කවලත් මේ වන විට දැඩි උණුසුම් කාලගුණ තත්ත්වයක් පවතින බවයි කාලගුණ විද්‍යා දෙපාර්තමේන්තුව පවසන්නේ.

එමෙන්ම මධ්‍යම කඳුකර ප්‍රදේශයට මේ දිනවල පවතින අධික වියළි කාලගුණික තත්ත්වය හේතුවෙන් වික්ටෝරියා ජලාශයේ ජල මට්ටම සීඝ්‍රයෙන් පහත බැස තිබෙනවා.

පැසිෆික් සාගර කලාපයේ ආරම්භ වී ඇති එල්නිනෝ තත්ත්වය මේ වනවිට ලොව පුරා කාලගුණ විපර්යාස රැසකට හේතු වී තිබෙනවා.

මේ හේතුවෙන් බටහිර යුරෝපා කලාපයේ ප්‍රංශය, ජර්මනිය, බෙල්ජියම, නෙදර්ලන්තය සහ ස්පාඤ්ඤය ඇතුළු රටවල් රැසක් මුහුණ පා ඇත්තේ දැඩි උෂ්ණාධික කාලගුණ තත්ත්වයකටයි.

විද්‍යාඥයින් අනාවැකි පළ කරන්නේ මෙය මෙතෙක් වාර්තා වූ ප්‍රබලතම එල් නිනෝ සිදුවීම් අතරින් එකක් දක්වා වර්ධනය විය හැකි බවයි.

මෙම එල්නිනෝ තත්ත්වයේ බලපෑම හේතුවෙන් මතුව ඇති වියළි කාලගුණ තත්ත්වය නිසා ප්‍රංශයේ පුද්ගලයින් විසි එක්දහසකට අධික සංඛ්‍යාවක් මේ වන විට මියගොස් තිබෙනවා.

එමෙන්ම මෙම අධික උණුසුම් කාලගුණ තත්ත්වයත් සමග ප්‍රංශය පුරා හටගෙන ඇති දරුණු ලැව් ගිනි තත්ත්වය ද වර්ධනය වී තිබෙනවා.