බන්ධනාගාර රැඳවියන්ගේ ගැටලු සොයා බැලීමට ඒකාබද්ධ යාන්ත්‍රණයක්

මෙරට බන්ධනාගාර 33හිම පවතින තත්ත්වය සහ රැඳවියන්ගේ ආරක්ෂාව වෙනුවෙන් ගෙන ඇති පියවර සමාලෝචනය කිරීමේ විශේෂ සාකච්ඡාවක් ජනාධිපති අනුර කුමාර දිසානායකගේ ප්‍රධානත්වයෙන් අද (07) පස්වරුවේ ජනාධිපති කාර්යාලයේදී පවත්වා තිබෙනවා.

එහිදී බන්ධනාගාර රැඳවියන් මුහුණ දී සිටින ගැටලු, ඔවුන්ගේ සුභසාධන කටයුතු මෙන්ම හදිසි අවස්ථාවකදී ක්‍රියාත්මක විය යුතු ආකාරය පිළිබඳ සොයා බැලීම සඳහා විශේෂ ඒකාබද්ධ යාන්ත්‍රණයක් ස්ථාපිත කිරීමටයි තීරණය කර ඇත්තේ.

ඒ අනුව, බන්ධනාගාර නිලධාරීන්, පොලීසිය, විශේෂ කාර්ය බලකාය (STF) සහ අවශ්‍ය අවස්ථාවලදී ත්‍රිවිධ හමුදාව ඇතුළු සියලු පාර්ශ්වකරුවන්ගෙන් මෙම යාන්ත්‍රණය සමන්විත බවයි ජනාධිපති මාධ්‍ය ඒකකය නිවේදනය කළේ.

එහිදී, ඉදිරි සතියේදී ස්ථාපිත කිරීමට නියමිත මෙම යාන්ත්‍රණය මඟින් බන්ධනාගාර රැඳවියන් සමඟද ඉදිරියේදී සෘජුවම සාකච්ඡා කිරීමට නියමිතයි.

මෙම විශේෂ සාකච්ඡාව සඳහා අධිකරණ සහ ජාතික ඒකාබද්ධතා අමාත්‍ය හර්ෂණ නානායක්කාර, මහජන ආරක්ෂක සහ පාර්ලිමේන්තු කටයුතු අමාත්‍ය ආනන්ද විජේපාල, ආරක්ෂක අමාත්‍යාංශයේ ලේකම් විශ්‍රාමික එයාර් වයිස් මාර්ෂල් සම්පත් තුයියකොන්තා, පොලිස්පති නීතිඥ ප්‍රියන්ත වීරසූරිය ඇතුළු බන්ධනාගාර සහ බුද්ධි අංශවල ජ්‍යෙෂ්ඨ නිලධාරීන් පිරිසක් එක්ව තිබෙනවා.