නුවරඑළිය දිස්ත්‍රික්කයේ ප්‍රාදේශීය ලේකම් කාර්යාලවල මුදල් අක්‍රමිකතා සෙවීමට ජනාධිපති නියමයෙන් විගණන කණ්ඩායමක්

නුවරඑළිය දිස්ත්‍රික්කයේ ප්‍රාදේශීය ලේකම් කාර්යාලවල සිදුවී ඇති මුදල් අක්‍රමිකතා සම්බන්ධයෙන් සොයා බැලීම සඳහා ජනාධිපතිවරයාගේ අධීක්ෂණය යටතේ විගණන කණ්ඩායමක් පත් කිරීමට අවශ්‍ය පියවර ගෙන ඇතැයි නුවරඑළිය දිස්ත්‍රික් සංවර්ධන කමිටුවේ සභාපති සහ නුවරඑළිය දිස්ත්‍රික් පාර්ලිමේන්තු මන්ත්‍රී මංජුල සුරවීරආරච්චි පැවසුවා.

නෝර්වුඩ් සහ තලවකැලේ ප්‍රාදේශීය ලේකම් කාර්යාලවල සිදුව ඇති අස්වැසුම ප්‍රතිලාභීන්ගේ මුදල් වංචාවත් සමඟ, දිට්වා සුළි කුණාටුවෙන් පීඩාවට පත් ජනතාවට ආපදා මුදල් ලබා දීම, කොරෝනා ව්‍යසන සමයේ අඩු ආදායම්ලාභීන්ට සමෘද්ධිය හරහා ලබා දුන් රු. 5,000 ක දීමනාව සහ සමෘද්ධි ලාභීන්ට රජය මගින් ලබා දෙන සහනාධාර සහ වැඩිහිටි දීමනා නිසි ලෙස ප්‍රතිලාභීන්ට ගෙවා ඇතිද යන්න පිළිබඳව මෙම විගණනය සිදු කෙරෙන බවයි වාර්තා වන්නේ.

ඒ අනුව, 2023 වසරේ සිට 2026 වසර දක්වා නුවරඑළිය දිස්ත්‍රික්කයේ ප්‍රාදේශීය ලේකම් කාර්යාල 10 ක මෙම විගණන කටයුතු සිදු කිරීමට නියමිත බව සඳහන්.

විගණනය ආරම්භ කිරීමට ප්‍රථම ඒ පිළිබඳව යම් තොරතුරු වෙතොත්, එම තොරතුරු තමන් වෙත ලබා දෙන ලෙස ප්‍රතිලාභීන්ගෙන් මංජුල සුරවීරආරච්චි මන්ත්‍රීවරයා වැඩිදුරටත් ඉල්ලා සිටිනවා.