විසි දෙකට එරෙහිව අදට පෙත්සම් 37ක්

විනිසුරු විශ්‍රාම වයස් සීමාව දීර්ඝ කිරීම සඳහා වන 22 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පත අභියෝගයට ලක්කරමින් මේ වන විට ශ්‍රේෂ්ඨාධිකරණයට පෙත්සම් 37ක් ඉදිරිපත් වී තිබෙනවා.

අදාළ පනත් කෙටුම්පත අධිකරණ අමාත්‍ය හර්ෂණ නානායක්කාර විසින් ඊයේ (18) පාර්ලිමේන්තුවට ඉදිරිපත් කළා.

ඒ මෙම නව ආණ්ඩුක්‍රම ව්‍යවස්ථා සංශෝධනයට ශ්‍රී ලංකා නීතිඥ සංගමය ඇතුළු පාර්ශ්ව රැසක් විරෝධය පළ කර තිබූ පසුබිමකයි.

එම පනත් කෙටුම්පත පාර්ලිමේන්තුවට ඉදිරිපත් වූ පළමු දිනය වන ඊයේ දිනයේම එය අභියෝගයට ලක් කරමින් ශ්‍රේෂ්ඨාධිකරණයට පෙත්සම් 6 ක් ඉදිරිපත් වුණා.

ශ්‍රී ලංකා නීතීඥ සංගමය, මහාචාර්ය ජී.එල්. පීරිස්, සමගි ජන බලවේගය, සර්ව ජනබලය පක්ෂය, නිදහස් නීතිඥ සංගමය ඇතුළු පාර්ශ්ව එලෙස පෙත්සම් ගොනු කළ අතර ඉන් පාර්ශ්ව කිහිපයක්ම පෙත්සම් විභාගය සඳහා පූර්ණ විනිසුරු මඩුල්ලක් ඉල්ලා සිටියා.

22 වැනි ව්‍යවස්ථා සංශෝධනයට එරෙහිව ශ්‍රේෂ්ඨාධිකරණය හමුවේ ඉදිරි සති දෙක තුළ පෙත්සම් ගොනුකළ හැකි අතර ඉන් පසුව සති තුනක් තුළ එම පෙත්සම් පිළිබඳ ශ්‍රේෂ්ඨාධිකරණයේ මතය කථානායකවරයා වෙත දැන්විය යුතු වනවා.