කොළඹ වරාය නගරය වෙත ඉහළ පෙළේ ඕමාන දූත පිරිසක්

ශ්‍රී ලංකාව සහ ඕමාන රාජධානිය අතර ආයෝජන සහ වෙළඳ සබඳතා තවදුරටත් පුළුල් කරගැනීමේ අරමුණින්, ඕමාන රජයේ ඉහළ පෙළේ දූත පිරිසක් කොළඹ වරාය නගරය (Port City Colombo) වෙත පැමිණ තිබෙනවා.

ඕමාන වාණිජ, කර්මාන්ත හා ආයෝජන ප්‍රවර්ධන අමාත්‍යාංශයේ විදේශ වෙළඳ සහ ජාත්‍යන්තර සහයෝගීතා උපදේශක පන්කජ් කිම්ජි (Pankaj Khimji)ගේ ප්‍රධානත්වයෙන් යුතුව මෙම දූත පිරිස පැමිණි අතර, ශ්‍රී ලංකාවේ ඕමාන තානාපති අහමඩ් අල් රෂ්ඩි (Ahmed Al Rashdi) ඇතුළු පිරිසක් ද මීට එක්ව තිබෙනවා.

මීට පෙර කොළඹ වරාය නගර කොමිෂන් සභාවේ නියෝජිතයන් ඕමානයේ මස්කට් නුවර සංචාරය කරමින් සිදු කළ සාකච්ඡාවල අඛණ්ඩ පැමිණීමක් ලෙස මෙම ප්‍රතිප්‍රදාන සංචාරය (reciprocal engagement) සැලකෙනවා.

මෙම සංචාරයේදී දෙරටේ විශේෂ ආර්ථික කලාප (Special Economic Zones) අතර ආයෝජන සහයෝගීතාව වර්ධනය කරගැනීම, ඕමාන - දකුණු ආසියා ආයෝජන සහ වෙළඳ කොරිඩෝව (Oman–South Asia Investment and Trade Corridor) ස්ථාපිත කිරීම මෙන්ම ඕමාන සමාගම් වරාය නගරය තුළ ලියාපදිංචි කිරීමේ ක්‍රමවේද පිළිබඳව පුළුල් සාකච්ඡා පවත්වා තිබෙනවා.

වරාය නගරයේ නියාමන රාමුව යටතේ සියලුම ආයෝජකයින්ට සාධාරණ සහ විනිවිදභාවයකින් යුත් පරිසරයක් සපයන බව කොළඹ වරාය නගර ආර්ථික කොමිෂන් සභාවේ අධ්‍යක්ෂ ජනරාල් රුවන් වික්‍රමසූරිය මෙහිදී අවධාරණය කර සිටියා.

ඕමානය හුදෙක් වෙළඳපළක් ලෙස නොව දකුණු ආසියාවට පිවිසෙන දොරටුවක් ලෙස වරාය නගරය භාවිත කරන ලෙසත්, ශ්‍රී ලංකාව මැදපෙරදිග කලාපය සමඟ සම්බන්ධ වන ප්‍රධාන පාලමක් ලෙස මෙම ආයෝජන කොරිඩෝව ගොඩනඟා ගැනීමට එක්වන ලෙසත් ඕමාන උපදේශක පන්කජ් කිම්ජි ආරාධනා කර සිටියා.

වරාය නගරය තුළ සමාගම් 175කට අධික සංඛ්‍යාවක් ලියාපදිංචි වී ඇති පසුබිමක, මෙම නව ඕමාන සබඳතාව හරහා ගල්ෆ් කලාපයෙන් තවත් දැවැන්ත ආයෝජන රැසක් ශ්‍රී ලංකාවට ආකර්ෂණය කර ගැනීමට අපේක්ෂා කෙරෙනවා.