පාදයක නහරයක් පිපිරුණු සුගීෂ්වර බණ්ඩාර බන්ධනාගාර රෝහලට ඇතුළත් කෙරේ

රක්ෂිත බන්ධනාගාර ගතව සිටින නව ජනතා පෙරමුණේ නායක සුගීෂ්වර බණ්ඩාර හදිසි රෝගී තත්ත්වයක් හේතුවෙන් ඊයේ (21) පස්වරුවේ බන්ධනාගාර රෝහල වෙත ඇතුළත් කර තිබෙනවා.

නව මැගසින් බන්ධනාගාරයේ රඳවා සිටි සුගීෂ්වර බණ්ඩාර මෙලෙස රෝහල්ගත කර ඇත්තේ ඔහුගේ පාදයේ පැවති ‘වෙරිකෝස්’ (Varicose veins) තත්ත්වය මත රුධිර නහරයක් පුපුරා යාම හේතුවෙන්.

රෝගී තත්ත්වය සැලකිල්ලට ගෙන සුගීෂ්වර බණ්ඩාර කඩිනම් වෛද්‍ය ප්‍රතිකාර සඳහා යොමු කරන ලෙස බන්ධනාගාර කොමසාරිස් ජනරාල්වරයාට නියෝගයක් නිකුත් කරන්නැයි ඉල්ලා ඔහුගේ නීතිඥවරුන් මීට පෙර කොටුව මහේස්ත්‍රාත් අධිකරණය හමුවේ මෝසමක් ගොනු කර තිබුණා.

එහෙත් එම ඉල්ලීම ප්‍රතික්ෂේප කළ කොටුව මහේස්ත්‍රාත් පසන් අමරසේන සඳහන් කළේ, බන්ධනාගාරගතව පසුවන රැඳවියෙකුගේ අභ්‍යන්තර පරිපාලන හෝ සෞඛ්‍ය පහසුකම් සම්බන්ධයෙන් සෘජු නියෝග නිකුත් කිරීමට අධිකරණයට නීතිමය බලයක් නොමැති බවයි.

ඒ අනුව අදාළ ඉල්ලීම බන්ධනාගාර කොමසාරිස් ජනරාල්වරයා වෙත සෘජුව යොමු කරන ලෙසයි මහේස්ත්‍රාත්වරයා නියෝග කර තිබුණේ.

හිටපු ජනාධිපති ගෝඨාභය රාජපක්ෂගේ පුද්ගලික ලේකම්වරයා ලෙස මෙන්ම, හිටපු ජනාධිපති රනිල් වික්‍රමසිංහ ගේ ධුර කාලයේදී විශේෂ ව්‍යාපෘති අධ්‍යක්ෂ ජනරාල්වරයා වශයෙන් ද ඔහු කටයුතු කළා.

රුපියල් කෝටි 22කට අධික රජයේ මුදල් සාපරාධී සාවද්‍ය පරිහරණය සහ විශ්වාසය කඩකිරීම පිළිබඳව එල්ල වී ඇති චෝදනාවලට අදාළවයි ඔහු රක්ෂිත බන්ධනාගාර ගතව සිටින්නේ.