අයි.ඩී.එච්.සුද්දාට එරෙහි නඩුවක් ඔක්තෝබර් 5 වැනිදා යළි කැඳවයි

ප්‍රබල පාතාල ක්‍රියාකාරිකයකු බව කියන සමන්ත කුමාර පෙරේරා හෙවත් අයි.ඩී.එච්.සුද්දාට එරෙහිව පවරා තිබූ නඩුවක් ඔක්තෝබර් 5 වැනිදා යළි කැඳවිමට කොළඹ ප්‍රධාන මහේස්ත්‍රාත් අසංග එස් බෝදරගම අද (24) නියෝග කළා.

සිද්ධියට අදාල නඩුව කැඳවු අවස්ථාවේදි බුස්ස බන්ධනාගාරය විසින් සැකකරු අධිකරණයට ඉදිරිපත් කර තිබුණා.

නඩුව කැඳවු අවස්ථාවේදි සැකකරු විසින් සාක්ෂි කූඩුවේදී සාක්ෂි ලබා දෙනු ලැබුවා.

දිවා කාලයේ ගෙවල් බිඳීම, පිස්තෝලයක් සන්තකයේ තබා ගැනීම, උණ්ඩ 12ක් සහ මැගසින් එකක් සොරකම් කිරිම ඇතුළු චෝදනා කිහිපයක් යටතේ සැකකරු ඇතුලු තිදෙනෙකුට එරෙහිව කුරුදුවත්ත පොලිසිය පවරා තිබූ නඩුවක් මෙලෙස කැඳවනු ලැබුවා.

එහි පැමිණිල්ල අවසන් බව පැමිණිල්ල වෙනුවෙන් කරුණු දක්වමින් කුරුඳුවත්ත පොලිසිය අධිකරණයට දැනුම් දුන්නා.

විත්තිය වෙනුවෙන් කරුණු දක්වමින් නිතිඥ සුසන්න කුමාර සැකකරුවන් සාක්ෂි කූඩුවට පැමිණ ප්‍රකාශයක් කරන බව කියා සිටි අතර අවශ්‍ය වන්නේ නම් සාක්ෂිකරුවන් කැඳවීමට මෝසමක් ගොනු කරමින් පෙර නඩු දිනයේදී අවසර ඉල්ලා සිටියා.

සිද්ධිය සම්බන්ධයෙන් නඩුව වැඩිදුර විභාගය සඳහා ඔක්තෝබර් 10 වන දින යළි කැඳවන ලෙස මහේස්ත්‍රාත්වරයා නියෝග කළා.

අයිස් සහ හෙරොයින් මත්ද්‍රව්‍ය සන්තකයේ තබා ගැනීම සහ ජාවාරම් කිරීමේ චෝදනාවලට වරදකරුවන් කෙරුණු ප්‍රබල පාතාල ක්‍රියාකාරිකයකු බව කියන සමන්ත කුමාර පෙරේරා හෙවත් අයි.ඩී.එච්.සුද්දා යන අයට කොළඹ මහාධිකරණය විසින් ජීවිතාන්තය දක්වා සිර දඬුවම් නියම කර ඇති අතර බන්දනාගාරය විසින් සැකකරු විශේෂ ආරක්ෂාවක් යටතේ අධිකරණයට ඉදිරිපත් කර තිබුණා.