ඉරානයට එරෙහිව ඉතිහාසයේ දැවැන්තම මූල්‍ය ප්‍රහාරය ඇරඹූ බව අමෙරිකාව කියයි

ඉරානයට එරෙහිව මෙතෙක් ක්‍රියාත්මක කළ දැවැන්තම මූල්‍ය ප්‍රහාරය ආරම්භ කර ඇති බව අමෙරිකානු භාණ්ඩාගාර ලේකම් ස්කොට් බෙසන්ට් පවසනවා.

ඉරානයට එරෙහිව නව සම්බාධක රැසක් ප්‍රකාශයට පත් කරමින් ඔහු සඳහන් කර ඇත්තේ, ඉරානය සමග පවතින සියලු ආර්ථික සබඳතා කපා හැරීමට අමෙරිකාව කටයුතු කරන බවයි.

එමෙන්ම ඉරානය සමග මූල්‍ය හෝ ආර්ථික සබඳතා පවත්වාගෙන යන ඕනෑම රටක් ජාත්‍යන්තර වශයෙන් හුදකලා කිරීමට කටයුතු කරන බවටද ඔහු අනතුරු අඟවා තිබෙන බව විදෙස් මාධ්‍ය සඳහන් කරනවා.

“Operation Economic Outcast” ලෙස නම් කර ඇති මෙම මෙහෙයුම යටතේ ඉරානයේ ගෝලීය මූල්‍ය සබඳතා ඉලක්ක කරමින් දැඩි ක්‍රියාමාර්ග ගන්නා බව බෙසන්ට් සඳහන් කළා.

ඩිජිටල් වත්කම්, තාක්ෂණය, රත්‍රන්, ගුවන් සේවා සහ නාවික ප්‍රවාහන යන ක්ෂේත්‍ර පහකට එරෙහිව සීමා පැනවීමට පියවර ගෙන ඇති අතර, පුද්ගලයින්, ආයතන සහ නෞකා 60කට ආසන්න සංඛ්‍යාවකටද සම්බාධක පනවා තිබෙනවා.

ඉරානය සම්බාධක මගහරිමින් තෙල් වෙළෙඳාමේ නිරත වීමට භාවිත කළ ජාල, මැදිහත්කරුවන් සහ මූල්‍ය මාර්ග හඳුනාගෙන ඇති බවයි අමෙරිකානු භාණ්ඩාගාර ලේකම්වරයා සඳහන් කර ඇත්තේ.

ඉරානයට එරෙහි මෙම ක්‍රියාමාර්ග මගින් ඉරාන ඉස්ලාමීය විප්ලවීය ආරක්ෂක බලකායට සහ එරට රජයට ලැබෙන ආදායම් මාර්ග අවහිර කිරීමට අපේක්ෂා කරන බව ඔහු කියා ඇති බවයි විදෙස් මාධ්‍ය වැඩිදුරටත් සඳහන් කරන්නේ.