වියළි කාලගුණයෙන් 84,000කට අධික පිරිසක් පීඩාවට

මේ වන විට දිවයිනේ පළාත් කිහිපයකට බලපා ඇති වියළි කාලගුණ තත්ත්වය හේතුවෙන් පුද්ගලයින් 84,000කට අධික පිරිසකට බලපෑම් එල්ල වී තිබෙනවා.

ආපදා කළමනාකරණ මධ්‍යස්ථානය පැවසුවේ දිස්ත්‍රික් 7ක පවුල් 26, 457කට අයත් පුද්ගලයින් 84,545 දෙනෙකු වියළි කාලගුණ තත්ත්වය හේතුවෙන් පීඩාවට පත්ව ඇති බවයි.

මේ අතර දිස්ත්‍රික් 5ක ප්‍රාදේශීය ලේකම් කොට්ඨාස 22ක පවුල් 24, 144කට අයත් පුද්ගලයින් 75,734 දෙනෙකු සඳහා පානීය ජලය බෙදා දීමේ කටයුතු ද මේ වන විට සිදුකෙරෙමින් පවතින බවයි වර්තා වන්නේ.

පවතින වියළි කාලගුණ තත්ත්වය හේතුවෙන් තමන් දැඩි පීඩාවට පත්ව ඇති බව ජනතාව පවසනවා.

මේ අතර ප්‍රදේශ කිහිපයකට අද දිනයේත් වැසි ඇති විය හැකි බව කාලගුණවිද්‍යා දෙපාර්තමේන්තුව පවසනවා.

එහි කාර්යයේ නියුතු කාලගුණ විද්‍යාඥ මලිත් ප්‍රනාන්දු මහතා පැවසුවේ බස්නාහිර, සබරගමුව සහ වයඹ පළාත් වල මෙන්ම මහනුවර, නුවරඑළිය, ගාල්ල සහ මාතර දිස්ත්‍රික්ක වලට විටින් විට වැසි බලාපොරොත්තු වන බවය.

මේ අතර කුකුළේගඟ ජලාශයේ ඉහළ ජල පෝෂක ප්‍රදේශවලට ලැබී ඇති අධික වර්ෂාපතනය හේතුවෙන් එම ජලාශයේ එක් වාන් දොරටුවක් විවෘත කර තිබෙන බවයි වර්තා වන්නේ.