වීඩියෝ කිරීමේ ආරවුලකින් ඇහැලියගොඩ සිසුවෙක් මරුට

ඇහැලියගොඩ, ඇරෑපොල ප්‍රදේශයේදී අද (30) අලුයම එල්ල කළ තියුණු ආයුධ ප්‍රහාරයකින් 17 හැවිරිදි පාසල් සිසුවෙකු ඝාතනය වී ඇතැයි පොලිසිය පවසනවා.

මෙලෙස මියගොස් ඇත්තේ ඇහැලියගොඩ ජාතික පාසලේ උසස් පෙළ සඳහා ඉගෙනුම ලබමින් සිටි සිසුවෙක්.

ඊයේ (29) සවස ඇරෑපොල පාසල හන්දිය ආසන්නයේදී තරුණයෙකු, තරුණියන් දෙදෙනෙකු සමඟ සංවාදයක යෙදී සිටින අයුරු වෙනත් පුද්ගලයෙකු විසින් ඔහුගේ ජංගම දුරකථනයෙන් වීඩියෝ කර ඇතැයි වාර්තා වනවා.

එම සිද්ධිය මුල් කරගනිමින් දෙපාර්ශ්වය අතර ආරවුලක් හටගෙන ඇති බවද වාර්තා වුණා.

පසුව සැකකරු අද අලුයම අදාළ සිසුවාගේ නිවසට පැමිණ තියුණු ආයුධයකින් පහරදී පලාගොස් ඇති බවයි මූලික පොලිස් පරීක්ෂණවලදී අනාවරණය වී තිබෙන්නේ.

මේ අතර ප්‍රහාරයෙන් බරපතල තුවාල ලැබූ සිසුවා ඇහැලියගොඩ මූලික රෝහලට ඇතුළත් කිරීමෙන් අනතුරුව මියගොස් තිබුණා.

සිද්ධියට සම්බන්ධ සැකකරු මේ වන විට ප්‍රදේශයෙන් පලාගොස් ඇති අතර, ඔහුව අත්අඩංගුවට ගැනීම සඳහා ඇහැලියගොඩ පොලීසිය වැඩිදුර පරීක්ෂණ මෙහෙයවනවා.