22 වන සංශෝධනයෙන් අධිකරණයේ නිදහසට පහර දීලා - විපක්ෂ නායක

මැර කණ්ඩායම්වල වෙඩි තැබීම් නිසා දින දෙක තුනකට වරක් ජනතාවගේ ජීවිත අහිමි වන අතරම, ආණ්ඩුව ගෙන එන ක්‍රියාමාර්ග නිසා රටේ ප්‍රජාතන්ත්‍රවාදය, ස්වාධීන අධිකරණය සහ නීතියේ ආධිපත්‍යය මුළුමනින්ම විනාශ වෙමින් පවතින බව විපක්ෂ නායක සජිත් ප්‍රේමදාස පවසනවා.

ඔහු, මේ බව කියා සිටියේ අද (04) හම්බන්තොට, තිස්සමහාරාමය කෝංවැලාන ප්‍රදේශයේ පැවැති ගොවි ගැටලු සොයා බැලීමේ ජන හමුවක් අමතමින්.

එහිදී වැඩිදුරටත් අදහස් දැක්වූ විපක්ෂ නායකවරයා සඳහන් කළේ, ආණ්ඩුව 22 වැනි සංශෝධනය ඉදිරිපත් කරමින් රටේ නිදහස් අධිකරණයට සහ ජනතාවගේ මූලික අයිතිවාසිකම්වලට දැඩි පහරක් එල්ල කර ඇති බවයි.

ජනතාවට දුන් පොරොන්දු ඉටු කිරීමට ආණ්ඩුව අපොහොසත් වී ඇති බව පෙන්වා දුන් ඔහු, විදුලි බිල සහ තෙල් මිල අඩු කරන බවට වූ පොරොන්දු කඩ කර ඇති බවද සඳහන් කළා.

එමෙන්ම මැතිවරණ සමයේදී 'අස්වැසුම' සහනාධාරය වැඩි කරන බවට ප්‍රකාශ කළද, වත්මන් පාලනය යටතේ අස්වැසුම කපා හරිමින් දුප්පත්කම තුරන් කිරීමට කිසිදු විධිමත් සැලැස්මක් ක්‍රියාත්මක නොකරන බවද මෙහිදී පැවසුවා.

පොහොර සහ බීජ මිල ඉහළ යාම, අලි-මිනිස් ගැටුම වැනි ගැටලු රැසකට ගොවීන් මුහුණ දී සිටින බවත්, වී සඳහා ලබා දෙන බවට වූ රුපියල් 150ක සහතික මිල ලබා නොදී ගොවියා අන්ත අසරණ කර ඇති බවටත් විපක්ෂ නායකවරයා මෙහිදී චෝදනා කළා.

එසේම, අධික බදු බර හේතුවෙන් ක්ෂුද්‍ර, කුඩා හා මධ්‍ය පරිමාණ ව්‍යාපාරිකයන් කඩා වැටී ඇති අතර පරාටේ නීතිය වැනි පියවර නිසා ව්‍යාපාරිකයන් දැඩි අර්බුදයකට ලක්ව ඇති බවද ඔහු පෙන්වා දුන් අතර, ජනතාව මුලා කර බලය ලබාගත් පාලනයට එරෙහිව, ජනතාවගේ ජීවත් වීමේ අයිතිය සුරක්ෂිත කිරීම වෙනුවෙන් පෙරමුණ ගැනීමට තමන් සූදානම් බවද විපක්ෂ නායකවරයා මෙහිදී වැඩිදුරටත් අවධාරණය කළා.