කෘත්‍රිම බුද්ධිය 'සුපිරි බුද්ධිය' කරන්නැයි ට්‍රම්ප්ගෙන් යෝජනාවක්

කෘත්‍රිම බුද්ධිය (AI) යන වචනය වෙනුවට එය "සුපිරි බුද්ධිය" (Super Intelligence – SI) ලෙස හැඳින්විය යුතු බව අමෙරිකානු ජනාධිපති ඩොනල්ඩ් ට්‍රම්ප් යෝජනා කර තිබෙනවා.

නිව්යෝර්ක් නුවර පැවති එක්සත් ජාතීන්ගේ මහා මණ්ඩල සැසිවාරය අමතමින් ට්‍රම්ප් ප්‍රකාශ කර ඇත්තේ, "Artificial Intelligence" යන නාමය තාක්ෂණය ව්‍යාජ දෙයක් ලෙස හැඟවෙන බවයි.

ඒ අනුව, ඉදිරියේදී අමෙරිකානු රාජ්‍ය ලේඛනවල පමණක් නොව ලොව පුරාද "Artificial" වෙනුවට "Super" යන වචනය භාවිත කරනු ඇතැයි ඔහු බලාපොරොත්තු වන බව සඳහන් කර තිබෙනවා.

ජනපති ට්‍රම්ප් පසුගිය සතියේ සිය Truth Social ගිණුම හරහා AI සඳහා නව නම් කිහිපයක් පිළිබඳව ජනතාවගෙන් මත විමසුමක්ද සිදුකර ඇති බව සඳහන්.

එහිදී "Superior Intelligence", "Extreme Intelligence" සහ "Supreme Intelligence" යන නම්ද යෝජනා වී තිබූ අතර, අවසානයේ "Super Intelligence" යන නම වැඩි කැමැත්තක් ලබාගෙන ඇති බවයි BBC පුවත් සේවය වාර්තා කරන්නේ.

කෙසේ වෙතත්, තාක්ෂණ ක්ෂේත්‍රයේ විශේෂඥයන් සඳහන් කර ඇත්තේ, "Super Intelligence" යන යෙදුම දැනට පවතින AI පද්ධති සඳහා භාවිත කිරීමට සුදුසු නොවන බවයි.

ඔවුන් පෙන්වා දෙන්නේ "Super Intelligence" යන්න තාක්ෂණ ක්ෂේත්‍රය තුළ මිනිසුන්ගේ හැකියාවන් සෑම අංශයකින්ම අභිබවා යන වඩාත් දියුණු බුද්ධි පද්ධතියක් හැඳින්වීමට භාවිත කරන යෙදුමක් බවයි.

මෙල්බර්න් විශ්වවිද්‍යාලයේ ඩිජිටල් ආචාරධර්ම පිළිබඳ කථිකාචාර්ය සයිමන් කොග්ලන් සඳහන් කර ඇත්තේ, මෙම නාම වෙනස නොමග යවන සුළු එකක් විය හැකි බවයි.

එමෙන්ම, සිංගප්පූරු ජාතික විශ්වවිද්‍යාලයේ පරිගණක විද්‍යා කථිකාචාර්ය බෙන් ලියොන්ග් පෙන්වා දී ඇත්තේ, වෘත්තීයවේදීන් විසින් "SI" යන යෙදුම වඩාත් ඉහළ මට්ටමේ AI තාක්ෂණයක් සඳහා භාවිත කිරීමට කැමති වනු ඇති බවයි.

කෙසේ වෙතත්, ජනපති ට්‍රම්ප් සමීප කණ්ඩායමේ ඇතැම් පුද්ගලයින් දැනටමත් නව "Super Intelligence" යන යෙදුම භාවිත කිරීමට ආරම්භ කර ඇති බවයි විදෙස් මාධ්‍ය සඳහන් කරන්නේ.