මිනිරන් කර්මාන්තය පුළුල් කිරීමට EDB අවධානය

ශ්‍රී ලංකාවේ පවතින මිනිරන් සම්පත් උපයෝගී කර ගනිමින් අගය එකතු කළ නිෂ්පාදන ප්‍රවර්ධනය කිරීම, ජාත්‍යන්තර වෙළෙඳපොළ ප්‍රවේශය පුළුල් කිරීම සහ කර්මාන්ත පාර්ශ්වකරුවන් සමඟ හවුල්කාරිත්වයන් ශක්තිමත් කිරීම කෙරෙහි ශ්‍රී ලංකා අපනයන සංවර්ධන මණ්ඩලය (EDB) අවධානය යොමු කර තිබේ.

මෙහි කොටසක් ලෙස, ලොව ප්‍රමුඛ පෙළේ ස්වභාවික මිනිරන් (vein graphite) නිෂ්පාදකයෙකු වන බෝගල මිනිරන් ලංකා ආයතනයේ මිනිරන් කැණීම් සහ සැකසුම් මෙහෙයුම් නිරීක්ෂණය කිරීම සඳහා EDB නිලධාරීන් පසුගියදා ක්ෂේත්‍ර චාරිකාවක නිරත වූහ.

මෙම සංචාරයේදී භූගත කැණීම් සහ නිස්සාරණයේ සිට සැකසීම, ශ්‍රේණිගත කිරීම, පිරිපහදු කිරීම සහ අපනයනය සඳහා සූදානම් කිරීම දක්වා මිනිරන් අගය දාමය පිළිබඳ සෘජු අවබෝධයක් ලබා ගැනීමට නිලධාරීන්ට හැකි විය.

මෙම නිරීක්ෂණ ශ්‍රී ලංකාවේ ඛනිජ අපනයන කාර්ය සාධනය ඉහළ නැංවීම සහ ඉහළ වටිනාකමකින් යුත් මිනිරන් නිෂ්පාදන සඳහා ගෝලීය සැපයුම්කරුවෙකු ලෙස ශ්‍රී ලංකාව ස්ථානගත කිරීම සඳහා උපායමාර්ග සකස් කිරීමට දායක වනු ඇතැයි EDB පවසයි.

මෙම වැඩපිළිවෙළ ඛනිජ සහ ඛනිජ ආශ්‍රිත නිෂ්පාදන ප්‍රධාන අපනයන ක්ෂේත්‍රයක් ලෙස හඳුනාගෙන ඇති ජාතික අපනයන සංවර්ධන සැලැස්ම (NEDP) සමඟද සමපාත වේ.

ශ්‍රී ලංකාවේ සුවිශේෂී ඛනිජ සම්පත්, විශේෂයෙන් ලෝක ප්‍රසිද්ධ vein graphite, අපනයන විවිධාංගීකරණය කිරීමට, ආයෝජන ආකර්ෂණය කර ගැනීමට සහ අගය එකතු කිරීම හරහා ඉහළ විදේශ විනිමය ආදායමක් උපයා ගැනීමට සැලකිය යුතු අවස්ථා සපයන බව NEDP මගින් හඳුනාගෙන තිබේ.

ස්වභාවික ස්ඵටිකමය vein graphite වාණිජ මට්ටමින් නිෂ්පාදනය කරන ලොව එකම රට ශ්‍රී ලංකාව වන අතර, එහි ඉහළ කාබන් සංශුද්ධතාව හේතුවෙන් ජාත්‍යන්තර වෙළෙඳපොළ තුළ විශේෂ පිළිගැනීමක් හිමිව තිබේ. මේ හේතුවෙන් ශ්‍රී ලංකාවේ මිනිරන් සඳහා උසස් කාර්මික යෙදුම්, ලිහිසි ද්‍රව්‍ය, කාබන් බුරුසු, බ්‍රේක් පෑඩ්, වර්තන ද්‍රව්‍ය සහ නැගී එන ග්‍රැෆීන් තාක්ෂණයන් සඳහා ඉල්ලුමක් පවතී.

වසර 160කට වැඩි පතල් කැණීමේ පළපුරුද්දක් සහිත බෝගල මිනිරන් ලංකා ආයතනය ගෝලීය වෙළෙඳපොළට මිනිරන් සැපයීම සම්බන්ධයෙන් ජාත්‍යන්තර කීර්තියක් දිනාගෙන තිබේ. නවීන සැකසුම් තාක්ෂණයන් සහ තිරසාර පතල් කැණීම් ක්‍රමවේද සඳහා සමාගම අඛණ්ඩව ආයෝජනය කිරීම මගින් අමු මිනිරන් අපනයනයෙන් ඔබ්බට ගොස් ඉහළ වටිනාකමකින් යුත් තාක්ෂණික ඛනිජ නිෂ්පාදන වෙත යොමුවීමට ශ්‍රී ලංකාවට ඇති හැකියාවද පෙන්නුම් කරයි.

මෙම සංචාරය අතරතුර EDB නිලධාරීන් සමාගමේ කළමනාකාරිත්වය සමඟ ඉදිරි වැඩපිළිවෙළ සහ මිනිරන් කර්මාන්තය මුහුණ දෙන අභියෝග පිළිබඳව සාකච්ඡාවකද නිරත වූහ.

රටේ පවතින සුවිශේෂී ස්වභාවික මිනිරන් තැන්පතු උපයෝගී කර ගනිමින් සහ අගය එකතු කිරීම තවදුරටත් ප්‍රවර්ධනය කිරීම තුළින් ඛනිජ අංශයෙන් ලැබෙන අපනයන ආදායම ඉහළ නැංවීම සහ ශ්‍රී ලංකාවේ අපනයන විවිධාංගීකරණ උපායමාර්ගයට සහාය වීම EDB හි අරමුණයි.

මෙම වැඩපිළිවෙළ තිරසාර ආර්ථික වර්ධනයට දායක වීම, ඉහළ නිපුණතා සහිත රැකියා අවස්ථා නිර්මාණය කිරීම සහ උසස් ඛනිජ නිෂ්පාදන සඳහා ගෝලීය මට්ටමේ සැපයුම්කරුවෙකු ලෙස ශ්‍රී ලංකාවේ කීර්තිය තවදුරටත් තහවුරු කිරීමට දායක වනු ඇතැයි අපේක්ෂා කෙරේ.