විදුලි වාහන ණය සඳහා සම්පත් බැංකුව සහ GV Auto නව හවුල්කාරීත්වයකට එළැඹෙයි

විදුලි වාහන (EV) මිලදී ගැනීම සඳහා විශේෂ වට්ටම් සහිත ණය යෝජනා ක්‍රමයක් හඳුන්වා දීම පිණිස සම්පත් බැංකුව , ගැව්රෝ ඉන්ටර්නැෂනල් ආයතනයට අයත් 'ජී.වී. ඔටෝ' (GV Auto) සමාගම සමඟ නව හවුල්කාරීත්වයකට එළැඹ තිබෙනවා.

මෙම ගිවිසුම යටතේ, ජී.වී. ඔටෝ ආයතනය හරහා සුදුසුකම් ලබන විදුලි වාහන මිලදී ගන්නා ගනුදෙනුකරුවන්ට බැංකුවේ ප්‍රකාශිත සාමාන්‍ය වාහන ණය පොලී අනුපාතිකයෙන් 0.5%ක විශේෂ වට්ටමක් ලබා ගැනීමට අවස්ථාව හිමි වෙනවා.

ජී.වී. ඔටෝ ආයතනය විසින් ප්‍රමුඛ පෙළේ Skywell BE11 විදුලි SUV රථ සහ Keyton වාණිජ විදුලි වාහන ඇතුළු ස්මාර්ට් සහ විශ්වාසදායක ප්‍රවාහන විසඳුම් රැසක් පාරිභෝගිකයන් වෙත සපයනු ලබනවා.

පරිසර හිතකාමී ප්‍රවාහන ක්‍රම වෙත යොමුවීමට අපේක්ෂා කරන පාරිභෝගිකයන්ට වඩාත් පහසු මිලකට සහ දිගුකාලීන ඉතිරියක් සහිතව තිරසාර ගමන් පහසුකම් ලබා දීම මෙම හවුල්කාරීත්වයේ මූලික අරමුණ වී තිබෙනවා.

සම්පත් බැංකුවේ පාරිභෝගික හිතකාමී මූල්‍ය විසඳුම් සහ ජී.වී. ඔටෝ ආයතනයේ පුළුල් වන විදුලි වාහන කළඹ මෙන්ම විකුණා දැමීමෙන් පසු ලබාදෙන මනා සේවාවන් (after-sales support) එකිනෙක සම්බන්ධ කරගනිමින්, ශ්‍රී ලංකාව තුළ හරිත විදුලි වාහන භාවිතය පුළුල් කිරීමට සහ පිරිසිදු මෙන්ම වඩාත් පිරිවැය-කාර්යක්ෂම ප්‍රවාහන ක්‍රමයක් කරා මාරුවීමට මෙමඟින් මහඟු පිටුවහලක් ලැබෙනු ඇතැයි සඳහන් කරනවා.