3ஆவது முறையாகத் திருமண பந்தத்தில் இணைந்தார் நடிகர் அமீர் கான்

பொலிவுட்டின் முன்னணி நடிகரான அமீர் கான் (61), தனது நீண்டகால காதலியான தொழில்முனைவோர் கௌரி ஸ்ப்ராட்டை இன்று (05) மும்பையில் உள்ள தனது இல்லத்தில் எளிமையான முறையில் திருமணம் செய்துகொண்டார்.

மும்பை, பாலி ஹில் பகுதியில் அமைந்துள்ள அமீர் கானின் இல்லத்தில் இரு குடும்பத்தினர் மற்றும் நெருங்கிய நண்பர்கள் முன்னிலையில் இவர்களது திருமணப் பதிவு இன்று முறைப்படி நடைபெற்றது.

ஜூலை 5ஆம் திகதி இரு குடும்பத்தினர் மற்றும் முக்கிய நண்பர்களின் பங்கேற்புடன் வீட்டில் எளிமையான முறையில் திருமணம் நடைபெறவுள்ளதாக முன்னதாக அமீர் கான் தெரிவித்திருந்தார்.

பெங்களூரைச் சேர்ந்த கௌரி ஸ்ப்ராட், வடிவமைப்பு மற்றும் அழகுக்கலை சார்ந்த தொழிலில் ஈடுபட்டு வரும் ஒரு தொழில்முனைவோர் ஆவார்.

கடந்த 25 வருடங்களுக்கும் மேலாக நண்பர்களாக இருந்த இவர்களது நட்பு, நாளடைவில் காதலாக மாறியுள்ளது.

கடந்த ஆண்டு மார்ச் மாதம் தனது 60ஆவது பிறந்தநாளின் போது அமீர் கான், கௌரியை ஊடகங்களுக்குத் தனது துணையாக அறிமுகப்படுத்தியிருந்தார்.

பொலிவுட்டின் வழக்கமான ஆடம்பரத் திருமணங்களைப் போலன்றி, முற்றிலும் தனிப்பட்ட முறையில் இந்த திருமண நிகழ்வு திட்டமிடப்பட்டு நடத்தப்பட்டுள்ளது.

இந்த நிகழ்வில் பொலிவுட்டின் பிரபல இயக்குநர்களான ராஜ்குமார் ஹிரானி, அசுதோஷ் கோவாரிகர், ராஜ்குமார் சந்தோஷி உள்ளிட்ட மிக முக்கிய பிரபலங்கள் சிலரே கலந்துகொண்டனர்.