චීන ගැතිකම වෙනස් කළා - විදේශ ඇමති මංගල

චීනය මත යැපුණු මෙරට ආර්ථික ප්‍රතිපත්තිය නැවත ඇගයීමකට ලක් කරන බව විදේශ කටයුතු අමාත්‍ය මංගල සමරවීර පවසනවා. ජපානයේ සංචාරයක නිරත වන විදේශ කටයුතු අමාත්‍යවරයා සඳහන් කළේ අනෙකුත් ජාතීන් සමග ද සමීප සබඳතා ගොඩනැගීමට කටයුතු කරන බවයි. නව රජය බලයට පත්වීමෙන් පසු ප්‍රථම වරට ජපානයේ සංචාරයක නිරත වන විදේශ කටයුතු අමාත්‍ය මංගල සමරවීර මෙම අදහස් පළ කළේ එන්.එච්.කේ. රූපවාහිනි සේවාව සමග සම්මුඛ සාකච්ඡාවකට සහභාගි වෙමින්.

 පසුගිය රජය චීනයෙන් ලබා ගත් මූල්‍යාධාර මෙරට මහා පරිමාණ දූෂණවලට මුල් වූ බවයි විදේශ කටයුතු අමාත්‍යවරයා වැඩිදුරටත් සඳහන් කර ඇත්තේ.

කොළඹ වරාය නගර ව්‍යාපෘතිය ද නැවත ඇගයීමකට ලක් කෙරෙන බව පැවසූ විදේශ කටයුතු අමාත්‍යවරයා සඳහන් කළේ එය ආරම්භ කිරීමේදී නිසි ක්‍රියාමාර්ග අනුගමනය කර නොමැති බව පෙනී යන බවයි.

දෙවන ලෝක යුද්ධයේ අළු මතින් නැගී සිටි ජපානය සැමවිටම ශ්‍රී  ලංකාවේ මිතුරෙකු ලෙස කටයුතු කළ බවත් විදේශ කටයුතු අමාත්‍යවරයා කියා සිටියා. ශ්‍රී ලංකාවට තවදුරටත් මූල්‍යාධාර සහ අයෝජන ලබාදෙන ලෙස විදේශ කටයුතු අමාත්‍ය මංගල සමරවීර ජපාන රජයෙන් ඉල්ලීමක් ද කළා.