වකුගඩු ජාවාරමට චෝදනා එල්ල වූ අයෙක් වෛද්‍ය සංගමයේ

වකුගඩු ජාවාරමට සම්බන්ධ බවට චෝදනා එල්ල වූ ශ්‍රී ලාංකික වෛද්‍යවරුන් 6 දෙනාගෙන් එක් අයෙකු තම සංගමයේ සාමාජිකයෙකු බව රජයේ වෛද්‍ය නිලධාරීන්ගේ සංගමය අද (24) පළමුවරට අනාවරණ කළා. එම සංගමයේ ලේකම් වෛද්‍ය නලින්ද හේරත් මෙම අනාවරණ සිදුකළේ කොළඹ පැවැති මාධ්‍ය හමුවකට එක්වෙමින්.

ඉන්දියාව සහ ශ්‍රී ලංකාව අතර වකුගඩු ජාවාරමක් පවතින බවට ඉන්දියාවේ හින්දු පුවත්පත පසුගිය දා අනාවරණ කළා. ඒ අනුව මේ පිළිබදව සොයා බැලීමට සෞඛ්‍ය අමාත්‍යවරයා පංච පුද්ගල කමිටුවක් ඊයේ පත් කළ අතර, දින 3ක් ඇතුළත එම කමිටුව පරීක්ෂණ කටයුතු අවසන් කිරීමට නියමිතයි. එමෙන්ම මෙම සිද්ධිය මුල් කර ගනිමින් මෙරට රජයේ සහ පෞද්ගලික රෝහල්වල විදේශිකයන් සඳහා සිදුකරන වකුගඩු සැත්කම් තාවකාලිකව නතර කිරීමට සෞඛ්‍ය අමාත්‍යාංශය තීරණය කළා.

මීට අමතරව සිද්ධිය පිළිබදව පොලීසිය මගින් පරීක්ෂණයක් සිදුකරන්නේ ද යන්න පිළිබදව පොලිස්පතිවරයා හෙට තීරණයක් ගැනීමට නියමිතයි.

වතුකරයේ ජනතාව වකුගඩු ජාවාරමට සම්බන්ධ කරගෙන ඇති බවට තමන් වෙත තොරතුරු වාර්තා වී ඇති බව අධ්‍යාපන රාජ්‍ය අමාත්‍ය වී. රාධක්‍රිෂ්ණන් ආගරපතන - ඩයගම ප්‍රදේශයේ ඊයේ පැවැති උත්සවයකට එක්වෙමින් සදහන් කළා.