හිරු නොබසින අධිරාජ්‍යයේ මහ රැජිණගේ රාජකීය අවමංගල්‍ය අදයි (සජීවී විකාශය)

හිරු නොබසින කිරුළ පළන් දෙවන එළිසබෙත් මහ රැජිණගේ රාජකීය අවමංගල්‍ය උත්සවය අද (19) පැවැත්වෙනවා.

මේ වනවිට ලන්ඩනයේ වෙස්මිනිස්ටර් ශාලාවේ තැන්පත් කර ඇති රැජිණගේ දේහයට අවසන් ගෞරව දැක්වීම සඳහා ජනතාවට එරට වේලාවෙන් අද උදෑසන 6.30 දක්වා අවස්ථාව හිමිවනු ඇති.

ඉන් අනතුරුව මහ රැජිණගේ දේහය උදෑසන 10.44 ට වෙස්මිනිස්ටර් ඇබේ දේවස්ථානය වෙත රැගෙන ඒමට නියමිතයි.

එම අවස්ථාවට රාජකීයයන් ද පා ගමනින් එක්වනවා.

පසුව වෙස්මිනිස්ටර් ඇබේ දේවස්ථානයේ සිට රැජිණගේ දේහය වින්ඩ්සර් මාළිගය වෙත රැගෙන ගොස් පැයක කාලයක් එහි තැන්පත් කෙරෙනු ඇති.

ඉන් අනතුරුව ශාන්ත ජෝර්ජ් දේවස්ථානයේ රැජිණගේ ස්වාමි පුරුෂයා වන පිලිප් ආදිපාදවරයාගේ දේහය තැන්පත් කර ඇති ස්ථානයේම පසෙකින් රැජිණගේ දේහය ද තැන්පත් කිරීමට නියමිතයි.

මේ අතර මහරැජිණගේ දේහය මේ වනවිට තැන්පත් කර ඇති වෙස්මිනිස්ටර් ශාලාවේ ඊයේ රාත්‍රි දේව මෙහෙයක් පැවැත්වුණු අතර, ඊට විලියම්, හැරී මෙන්ම ඔවුන්ගේ ආර්යාවන් සහ මුණුබුරු මිණිබිරියන් එක්ව සිටියා.

මෙහිදී රාජකීය වරප්‍රසාද අත්හළ හැරී කුමරු රාජකීය ගුවන් හමුදා නිල ඇඳුමින් සැරසී සිටීම විශේෂත්වයක්.

එමෙන්ම තුන්වන චාල්ස් රජු සහ විලියම් කුමරු රැජිණගේ දේහයට අවසන් ගෞරව දැක්වීමට පැමිණ සිටින ජනතාව හමුවී කථාබහක නිරතව තිබුණා.

දශක හතක කාලයක් බ්‍රිතාන්‍යයට නායකත්වය දුන් දෙවන එළිසබෙත් රැජිණට අවසන් ගෞරව දැක්වීම සඳහා ලෝක නායකයන් රැසක් මේ වනවිට ලන්ඩනයට එක්රැස්වී තිබෙනවා.