වනඅලි ගැටලුව විසඳීමට දිස්ත්‍රික් මට්ටමින් කමිටු පත් කෙරේ

 

ජනාධිපතිවරයා මෙම උපදෙස් ලබා දුන්නේ වන අලි ගැටලුව විසඳීම පිළිබඳ ජනාධිපති කාර්යාලයේදී අද (20) පස්වරුවේ පැවති සාකච්ඡාවේදීයි. 

 

මෙහිදී වන අලි ගැටලුව බහුලව පවතින අනුරාධපුර, පුත්තලම, පොළොන්නරුව, අම්පාර, හම්බන්තොට, මොනරාගල, කුරුණෑගල, බදුල්ල සහ ත්‍රිකුණාමලය යන දිස්ත්‍රික්ක පිළිබඳ විශේෂ අවධානය යොමු කර ඇති අතර ඒ ඒ දිස්ත්‍රික්කවල පවතින ගැටලු දිසාපතිවරු විසින් ජනාධිපතිවරයා වෙත ඉදිරිපත් කර තිබෙනවා. 

 

එසේම වනජීවි දෙපාර්තමේන්තුවේ දැනට පවතින පුරප්පාඩු, රථ වාහන අවශ්‍යතා සහ රාජකාරී කර ගෙන යාමේදී මුහුණ දෙන ගැටලු පිළිබඳවද මෙහිදී සාකච්ජා කර ඇති බවයි වාර්තා වන්නේ. 

 

වන අලි ගැටලුව විසඳීමේ යාන්ත්‍රණය කාර්යක්ෂම කිරීමේ අවශ්‍යතාව මෙහිදී අවධාරණය කළ ජනාධිපතිවරයා ජනතාව සමඟ සමීපව මෙම වැඩ පිළිවෙළ ක්‍රියාවට නැංවීමේ වැදගත්කම ද පෙන්වා දී තිබෙනවා. 

 

ඒ අනුව මෙම කටයුතු සිදු කිරීම සඳහා අදාළ දිස්ත්‍රික්කවල වගකිව යුතු නිලධාරීන්ගෙන් සමන්විත කමිටු ඉදිරි මාසය තුළ පත් කිරීමටද ජනාධිපතිවරයා උපදෙස් ලබා දී ඇති බවද සඳහන්. 

 

දැනට වනජීවී දෙපාර්තමේන්තුවේ පවතින පුරප්පාඩු පිරවීම සඳහා විශ්‍රාමික නිලධාරීන් කොන්ත්‍රාත් පදනම මත බඳවා ගන්නා ලෙසද උපදෙස් දුන් ජනාධිපතිවරයා, ඒ සඳහා කඩිනම් ක්‍රියා මාර්ගයක් ලෙස සිවිල් ආරක්ෂක නිලධාරීන් නිශ්චිත පුහුණුවක් සමඟ වනජීවී දෙපාර්තමේන්තුවට අනුයුක්ත කිරීමටත්, ඊට අදාළ නීති සම්පාදනය කිරීමටත් නිලධාරීන්ට උපදෙස් ලබා දී තිබෙනවා. 

 

ජනාධිපතිවරයා මෙහිදී උපදෙස් ලබා දී ඇත්තේ වන අලි ගැටලුව විසඳීමට, පොලිසිය ඇතුළු ආරක්ෂක අංශ සහ වනජීවී දෙපාර්තමේන්තුව ඒකාබද්ධව දැනට ගෙන යන මෙහෙයුම් වඩා විධිමත් සහ කාර්යක්ෂම කිරීමටයි.