කොළඹ ගංවතුර සෙමෙන් බසී

තවමත් පවතින කොළඹ දිස්ත්‍රික්ක අධි ගංවතුර තත්ත්වය තවදුරටත් පහත යමින් කැලණි ගඟේ නාගලගම්වීදියෙන් ජල මට්ටම අඩි 7.30 දක්වා පහත බැස තිබෙනවා. 

එය තවදුරටත් බැස යමින් පවතින බවයි වාරිමාර්ග දෙපාර්තමේන්තුව පවසන්නේ. 

අද(02) පෙරවරු 9.00 වනවිට ජල මට්ටමට එලෙස වාර්තා වූ අතර පෙරවරු 8 වනවිට එය අඩි 7.35 ‌මට්ටමේ පැවතුණා. 

කැලණි ගඟේ හංවැල්ල ප්‍රදේශයෙන් මීටර් 7.50 මට්ටමේ පවතින අතර එය ද බැස යමින් පවතින බවයි නවතම වාර්තාවෙන් පෙන්වා දෙන්නේ. 

කැලණි ගඟේ සෙසු සියලු ස්ථාන මේ වනවිට සාමාන්‍ය මට්ටමට පැමිණ තිබෙනවා. 

මී ඔයේ මහා ගංවතුර මට්ටම ද මේ වනවිට මීටර් 8.64 දක්වා පවතින අතර එය ද බැස යමින් පවතින බව සඳහන්. 

කළු ගඟ ප්‍රදේශයෙන් මීටර් 3.86 ද කළු ගඟේ කලවැල්ලව ප්‍රදේශයෙන් මීටර් 6.20 ක් ලෙස ද පවතින ජල මට්ටම තවදුරටත් පහත යමින් පවතිනවා. 

ප්‍රධාන ජලාශවල සෙසු සියලු ජල මටට්ටම් සාමාන්‍ය මට්ටමට පැමිණ තිබෙන බවයි වාරිමාර්ග දෙපාර්තමේන්තුව පවසන්නේ.